عزيت نفسي والتعزي جهاله = عمن هوى قلبي ولا هوب صبار
قلب تعلق باجنبي عز تاله = لاهوب في القربه ولا ساكن الدار
الا السفن بالشرع يمكن تناله = لين اخطفن دبر بالاولام سنجار
حبه دعاني بحالة أي حاله = جسمي مع العالم وقلبي معه طار
لو شفت مابي حل يوم ارتحاله = ودموع عيني فوق الاوجان نثار
في محمل حولي خلي وداله = ما همهم همي ولا هم لي انصار
الكل منهم مشتغل في حلاله = في جمع ذا الدنيا غدا الهم له كار
كل يحسب مصلحة راس ماله = ويوالم لدار بها زود الاسعار
وانا غديت من الولع في عباله = مفتون قلبي بالرعابيب الابكار
اتبع ديار الزين وارجي وصاله = أرجي كما ترجي الممحلين الامطار
ما بين أيديهم سادتي صرت آله = في كف صناع كما راد تندار
عبد مليك للحسن مع جماله = والملح والقبله مع ذيك الانوار
بدور حسن في ليالي الكماله = اقبالهم ينسيك يسليك الأكدار
يحرم علي الشرب لذة زلاله = لا من ذكرت الولف ظليت محتار
كني مضيع مال والا حواله = أصفق براحاتي وانادي بالاشعار
مجنون ليلى في الهوى ما جرى له = عشر الذي بي ولا عشر معشار
لكن نفسي ما تحب الجهاله = والعقل ينهاني ولا نيب هذار
اصبر على حمل يكود احتماله = واخفي الهوى حتى عن الاهل والجار
سري بصدري بعد محد يناله = مقفول بقفول صعيبات وكبار
الحب ما هو كل من جا ارتكاله = يبغي شجاع في الملاقاة صبار
يبغي فتى عقله رجح بالكماله = يمشي يحسب خطاه في الحي لا سار
لا خير في اللي ما يراعي رجاله = يخاف منقود ويحذر من العار
ألف صلاه ختام نظم المقاله = تغشي النبي والآل والصحب الاطهار