يا مرحبن اليوم وامس وقبل امس = والقابله واللي بعد من وراها
رحبت بالمحبوب لو حمس من حمس = لو زعلت الخلان ما بي رضاها
حي الذي لا من لفا يبهج النفس = تستر به نفسي ويذهب عناها
عندي يساوي اقباله الشام والفرس = وقصور مصر ومن سكن في قراها
سوى بقلبي غض الانهاد له غرس = وكل ما نصيته نور عيني سقاها
مطموس حب صويحبي في الحشا طمس = ارسومها ما كال من جا قراها
أرخصت له روحي وكني له بحبس = أدرا واحاذر كلمة ما هواها
مادام انا مع صافي الخد في أنس = وان فارقته العين لا واشقاها
عامين وصله تنقضي كنها أمس = ويومين م الفرقا سنين اراها
يا بوردوف نست الحال لي نس = ما فوق ما حملتني من عناها
الله عسى ما هوب حظي معك عمس = يا جعل نفسي فيك تلحق مناها
آمين قل آمين يا سيد من لبس = هدم السواد وسيد منهو زهاها
أعز واغلى من وطا الخد بالخمس = وخير من شافته العيون أو ملاها
يفضح سنا نور الغضي ساطع الشمس = وينوب في ليل الدجى عن ضياها
غرة جبين صويحبي كنها الطرس = والا القمر في منزله لا تناها
أو وسط لبيب ناعم ما بعد لمس = وعيون تذبح كل من جا احذها
ما صار في جمل المخاليج له جنس = مخلوق من جنات عدن ورباها
حبيب محب لي ولا هوب لي نمس = ولو هو ديونه في الهوى ما وفاها
يهواني بقلبه وانا اهواه وآحس = والنفس ما تهوى حد ما هواها
ما هوى من الخفرات غيره حد بس = هو منوتي هو طلبتي هو رجاها
مسمار حبه ضارب القلب بالعكس = ومعسكر ما بين روحي وحشاها
يا نابي الردفين يا مخضب الخمس = يا اللي لنفسي اليوم غاية مناها
تكفى تداركني قبل آصل الرمس = ياريف روحي لا تشمت عداها
الله له يحفظ من الشر ويحرس = ويسقي حقوق الغيث ارض وطاها
غيث هميل في مجاريه له رجس = وتخصب ديار ساكن في حماها
بجاه من أرسل إلى الجن والإنس = مني صلاة له وهو منتهاها