من عاسر الايام ما نال مطلوب = منها ولو يملك جميع النواحي
لابد م لدورات الايام دالوب = بالعسر مر ومرة بالنجاح
باصبر ولونا بالصبر كنت مغلوب = لعل صبري اليوم يحدث صلاح
يا الورق خل النوح خله المنيوب = خل البكا يا الورق لي والنياح
تبكي طرب والا فانا ابكاي مكروب = من حادث يا الورق شطف الياحي
يا مل قلب اصبح اليوم مصيوب = يخفق كما يخفق رفيف الجناح
قلب يراه الحب وادعاه مسلوب = ما يستعيش إلا بماي القراح
قلب غدا ما بين جاذب ومجذوب = ليله نهاره في العنا والتراح
به علة ما فادها الكي وطبوب = عليك يا نور الوطن والمراحي
يا اللي زهى حسنه بلا دل وذهوب = عذب السجايا مولع بالمزاح
زين المعنق نابي الردف مسلوب = كالخيزرانه لا تثنى أو ماحي
بمعزل له هاضم الكشح منهوب = وخصر نحيف به يجول الوشاح
وعين بها كم ذابت جسوم وقلوب = اسطى وامضى وقعها م الرماح
قل ما حلا في مضمره خفقة الثوب = لا من ضرب ردفه هبوب الرياح
طفل على حجاته العز مكتوب = لامن تبدى لي رميت السلاح
قلبي الي نادوا سمي له يذوب = وان مر ذكره في الملا قمت صاحي
وان كان هو عن ناظر العين محجوب = فشخصه قبالي في المسا والصباح
يا سيد روحي يا بعد كل محبوب = والله ما اسمع فيك قول اللواحي
لو لامني من لامني عنك ما توب = ما توب انا يا سيد من جا وراح
جعل اللوايم فدوة لك ولا هوب = يافي بحقك غير منك السماح
والا فانا عبد من العام محسوب = مالي بنفسي صرفة وانتزاح
لك بالحشا يا زين وديان وشعوب = لك بينهن يا زين مسرى ومراح
افرح بوعده والوعد ما قضى نوب = سراب لال للوراريد لاح
أوعاد عرقوب كما قيل وكذوب = ما للمعنى من وعدها رباح
يا ليت يسعى بيننا اليوم مندوب = ما ثوق ما يوم بالاسرار باح
حتى ابين حالتي له بمكتوب = يشرف عليها سيد كل الملاح
يا زين ريع لي ترى القلب منهوب = وصلك لمثلي يا عشيري امباح
يا عونة الله ذاب حالي وانا لوب = ما نلت منه إلا الشقا والتراح
يا مولّف ما بين يوسف ويعقوب = من عقب ما هو ميس منه حاجي
تلف بشمل شته الدهر بشعوب = وتعيد سجات الطرب وانشراح
مني صلاة مع سلام على الدوب = للمصطفى والصحب أهل الصلاح