أهلا وسهلا حي مندوب = حيه وحي اللي عنا به شمام
حي السلام اللي تفتح له ابواب = قلبي وتحيا به عروق العظام
حيه عدد ما ناح ورق بمرقاب = أو عد من صلى خلاف اليمام
ويا مرحبا تسعين والفين ترحاب = ويا مرحبا ما هل وبل الغمام
أو عد ما شمس نحت صوب الغياب = وعداد ما برق بدى في ظلام
ترحيبة الغايب إلى جا من غياب = فرحين به من عقب طول المشام
للي عليهم مدمع العين سكاب = أحباب قلبي من جميع الانام
هم منوتي واقصى مرادي م الاصحاب = اللي وفوا لي بالعهد والذمام
أهل الجمايل والمعاني والاداب = أهل الصخا والجود عرب حشام
سمحين الأنفس هم عريبين الانساب = ما رئيت شرواهم أبد في الكرام
ينشون للعاني بترحيب ووجاب = وملاطف من قبل رد السلام
حاشوا معان ما لها عد وحساب = عن عدها يقصر بديع الكلام
الله عساهم في حمى رب الارباب = يجزون بالخيرات دوم الدوام
ويالله عسى شمل تفرق بالاسباب = واضحى شتات يجتمع بلتمام
ويرجع لنا ما فات مع ذيك الانجاب = يوم البخت والحظ معطي مرامي
يوم الليالي مسعفات بالاطلاب = وسعود حظي في بروج التمام
واليوم واويلاه قاسيت الانشاب = وبقيت كالضايع بليل الظلام
مشفوف متلوف عويج ومنصاب = اسهر إلى نامت عيون الانام
ما انساح لي بال ولا القوت لي طاب = والعين عيت لا تهنا بمنام
من زود ما بي كن بالجاش لهاب = ومن العنا يا ناس ضاع افتهامي
لاجن ليلى زاد ما بي م المصاب = ولا اقبل نهاري قمت اشكي الغرام
ولا نافع هذا ولا ذاك لي ثاب = إلا كما تدليه طفل الفطام
فيالله ياللي من تررجاك ما خاب = يا واسع فضله علينا دوام
تجبر عزا قلب من البعد منذاب = مفجوع متلوع براه السقام
هذا وصلى الله على خير الاصحاب = محمد وآله وصحب اكرام