يا قلم بالله قم لي = هات لي صافي السجل
باكتب ابيات طرا لي = في حشا قلبي خفيه
من حشا قلب غدا به = غرو بزمة شبابه
هو سبب عوقي وما به = شفته وجتني البليه
صادني حبه بحيله = ليت من يحظى بنيله
لو قدر يوم وليله = نجتمع بارض خليه
واشتكي له ما جرى لي = والذي بي من وبالي
آه أنا ما نيت سالي = عن وصل عذب الشفيه
هايف الخصرين طاوي = يا علي وصله يداوي
ما بقلبي من شكاوي = لو دعا روحي شقيه
لاحظيت انا بخلي = بارخص بروحي وكلي
لو زعل غيره يولي = ما علي من البريه
جادل تايه بعوده = توه بطلعة سعوده
تشبه اللولو عقوده = لا تبسم بالثنيه
يفضح البراق خده = لابدى نوره ومده
وآحلو خصره وقده = لا تمشى في حويه
مشيته بالهون خايف = من ثقل ذيك الردايف
تفصم حجول رهايف = في وسط ساقه مليه
كامل كل المعاني = هو ترى سيد الغواني
حرزه السبع المثاني = عن حسود له دهيه
لا حكى ضليت حاير = صابني منه العباير
وانهمر دمعي نثاير = مثل مزن بالعشيه
يا علي ما قدر فراقه = ماخذ قلبي وساقه
آسره عنده وعاقه = ليت هو رده عليه
قلت له يا سيد روحي = يا بعد حيي وروحي
لا توزّمني أبوحي = واظهر سدود خفيه
ارحم محب شكى لك = يرتجي منك وصالك
لو بنظرة من جمالك = تبري جروح طريه
قال انا ما نيب جافي = ما بدا مني خلافي
ذا فعل حظك الهافي = باير ما به شفيه
قلت له يا زين داري = الخبر عندي وداري
مير خذ لي منه ثاري = واحكم النا بالسويه
ما حد غيرك بزبنه = ارحم المقروح جفنه
قلده فضل ومنه = يشكرك لين المنيه
بادر صروف الزمان = لا تسوف بالأماني
فالعمر يا زين فان = والليالي قلبيه
يا علي ناظر لحالي = من غرامه صار بالي
صاير مثل الخلال = من سبب زيه وغيه
عفت أنا طيب الطعام = ما تهنيت بمنامي
بس اجاوب للحمام = لا لعا بروس البنيه
ويل من حل بهواهن = اشهد انه من بلاهن
في شقا منهن ولا هن = يسعدنه بالبغيه
قاسيات قلوبهن = مرهفات سيوفهن
ما محب يرحمن = دينهن ظلم الراعيه
والهوى قاضيه مسرف = في الحكم ما هوب ينصف
لا استبان الحق يحرف = ظالم ركب اردعيه