أهلا وسهلا بالحبيب وجيته = لكين والف مرحبا بتحيته
جاني عنا لي ما سمع قول العدا = أنا احمد الله يوم زانت نيته
من طاوع الحساد ما نال المنى = لا بارك الله في الحسود وساعته
ياجعل من يسعى بفرقا صاحب = يعطى العمى والفقر يبلى بفاقته
هنا تفضل يا حبيبي مرحبا = روحي فدا لك والضمير ولبته
عيني ترى لك منزل يا سيدي = بصباي تحماك عسكر دولته
شوفك حياتي يا غناتي والمنى = وصلك نعيمي في الحياة وجنته
بتنا تهنينا معاه بليله = يا ليتها تسعين عام ليلته
مر ينادمني ومر ينثني = كالخوط في كفي ليان بعطفته
غض غضيض مايس متمايل = تايه بحسنه والمحاسن غرته
غايه نهايه في الجمال وفي البها = كنه بدر تم تحالا طلعته
لا من جلس بين الغواني زانهن = بدر وزينات العذارى هالته
يوسف زمانه في المجالس والحسن = سبحان من كمل وعدل صورته
ما خلق مثله في الملا حشا أبد = ما شفت مثله في خفافة طينته
مع ذا وزين فايج كل النسا = وأوصاف واعطاف تحالا مشيته
وخصره وساقه لا مشى له ساعة = يشكون من كتفه وردفه لقامته
هذا تحمل ذا وهذا منهضم = ما فيه من قلبه جفاسة قوته
دعنا نسج ونهتني يا طربتي = خل الحسود يموت عنا بغصته
وش ذا الحياه اللي تقضت ما انفعت = ما من فيها نور عيني بزورته
يوم تقضا ما اشوفه لالفا = والله يعود ايام وصله وجيّته
هو نظر عيني سفرها لادجا = ليل الظلام وشعشعت به غرته
لازرتني أحييتني يا سيدي = والا ان هجرت القلب زادت علته
لوما الحيا لا شق جيبي واشتكي = هذا هجرني يا عرب وش حجته
لا من خطا مني ولامن زلة = إلا المحبة والمراعا وحشمته
يشكي ولا يشكي الي جا مشتكي = ظالم ولكن مستجابه دعوته
ظني جميل في جنابه لو جفا = ارجي عسى قلبه يلين بوصلته
يوم ويوم ينقضى عنا الجفا = وتعود ليلات التهاني بعودته
للناس عيد يفرحون بعودته = وانا علي العيد ساعة رويته
الله كريم ما يخيب سايل = نطلب فضل جوده ونرجي رحمته