قال الذي عنده على القاف مقدور =يختار في الأمثال لا جا طلبها
وقبل البيوت اتقال يبني لها اجسور=واللي بناها قالها وانتخبها
والقاف يا تيله مطيع ومصخور=قوارع يدب نوادر صعبها
ون جا لزوم نلتزم فيه واحضور=ونقضي اللزوم ولا نخاوي غيبها
وعيد الوطن ذا اليوم نرفعله انشور=عيد الرجال اللي رفيعه ارتبها
عيد الوطن اللي به الشعب مبرور=تعتز به روس الرجال وطربها
عيد الوطن اللي له المجد دستور=ونعتز به بين الخليج اوعربها
وعيد الزعيم اللي له الراي والشور=زعيم رايات المعزه كسبها
وزايد يزيد الخير للخير مامور=وهايب من عند ربه وهبها
وفي قمة التاريخ صاير لنا دور=وراعي الحقايق بالحقيقة كتبها
وقاد الرجال وقايد الخير مشكور=قاد الرجال وللمعزه جذبها
وله موقف في وقتنا اليوم مشهور=وفعل الرجال وطيبها من حسبها
وزايد بفعله زاد بالخير مذكور=وكم وقفة خلص عقايد نشبها
وعساه من كل الصواديف ماجور=ويحماه والي العرش نايب سببها
وعساه في سعد الليالي ومسرور=بامر الذي علام خافي نيبها
وله خطة يدوي بها الراس ويدور=وضد الخصام اللي تفتل شنبها
واخوانه الحكام افين لشبور=لا قال كلمه حققوله وجبها
ولبو نداه ولا اذخروا منه مذخور=وقت الشدايد نور عينه عجبها
وعيال زايد كل شهم ومنعور=كنهم افهود في ليالي قربها
وعلى يمينه كنهم صف طابور=لي قاد لول محتمين عقبها
وتزهي بهم دار لها نور وازهور =وللدار سور ودرعها من جنبها
وغنت لهم بيض اتشابه على الحور=نجل العيون اللي مظل هدبها
وهذا كلام الحق ما فيه منكور=ببيات شعر قالها من نسبها
وصلاتي وتسليمي ملايين وكرور=على رسول للشريعة نصبها