يقول من حلو المثايل ربيعه=وقوت لحاله دون شرب وزادي
والقاف ما يرضا عليه ابهزيعه=ويختار جزلات البيوت الجدادي
وقاف بلا مضمون يخسر وديعه=والحق من يخطيه ويش استفادي
وخسران من يشريه واللي يبيعه=ومثل الذي تايه عن الدرب غادي
والقاف يطلب له جسور منيعه=وفكر يخطط بنيها بالركادي
ويا الله يا ناظر بعين وسيعه=ويا عالم الاسرار خافي وبادي
ويا عالم بالغيب واذنك سميعه=يا رب يا معبود يا خير هادي
انك تقدينا طريق الشريعه=وتكتب لنا درب الهدى والرشادي
وقالوا هلال وقلت شوفه طميعه=وهذا الهلال لي عليه اعتمادي
عيد النحر عيد القلوب المطيعه=عيد ملوك العرش لجله اتنادي
وسنة رسول وسنة اللي تبيعه=وسنة قلوب مخلصه باجتهادي
وعيد على الاسلام يسفر لميعه=ناس تزور البيت من كل وادي
ولك الحمد يا داير علينا رجيعه=بدور الزمان نعود له واستعادي
وعيد تهني به قلوب وليعه=وعلى اليقين بصدقها واعتقادي
وحنا نهني والأذاعه تذيعه=للقايد اللي قادها بالقوادي
وغيث الأرواح المؤمنات المجيعه=لي جات حاديها من الوقت حادي
ويمناه سبلا والعزايم طليعه=وسموه زايد زاد بالفعل زادي
ودرب المراجل بالعزم والذريعه=وعسره على اللي يكسبون الرقادي
وزايد كسبها والمواكر رفيعه=وفعله كما بدر على الناس بادي
حاكم وطنا ما لفانا نزيعه=متملك من ورث جده وكادي
تاريخ له وشهود صدق وقيعه=والصدق نور وكلمة ما تزادي
ونهب برد ما يوازي صقيعه=برده يبيد موميات الليادي
زايد ذرانا من كلايف هليعه=وعن شمسنا في القيض ظل وبرادي
وعيال زايد مرقبين التليعه=مثل الحرار الموجبه للهدادي
كل اشقر ظربات كفه شنيعه=ومن ينقله جاب العشاله وصادي
ومن طبع أبوهم دارسي الطبيعه=ولا خسر من جاب القروم العوادي
وصلاة ربي عد نور شعيعه=لي بان سفر مظلمات السوادي
على الرسول اللي ينجي شفيعه=لي جا نهار فيه ضول احتشادي