الحب ما يسكـن قلـوب ومحانـي=الحب أسمى عاطفه تسكن الـرّوح
يا حبّك اللّي كل ما أظمـا سقانـي=سراب لال ودرب مهجور ونزوح
ما اقول منك اللّي لفانـي كفانـي=لأنّي أحبك هجر وعنـاد وجـروح
إن غبت عنّي طال عمـر الثّوانـي=تقول عمر الثّانية من عمـر نـوح
وان جيتني مـرّت ليالـي زمانـي=ما كنّها إلا البـرد بعيونـي تلـوح
قبل الجفا عذرك سبقنـي وجانـي=لا تعتذر ذنبك من العـام مسمـوح
أبني على شوفك صروح الأمانـي=وشلون ما تبني على شوفي صروح
إن كان غيري عوّضك عن حنانـي=ما عاضني غيرك من الغيد مملوح
إنت الأخير .... وانتـه الأوّلانـي=لو كان حبّك حد قلبي على الصّوح
والله مـا بـاح بغرامـك لسانـي=إلا عيونـي دوم يطرونـك تبـوح
كتمت سرّك لين دمعـي عصانـي=راعي الهوى لو يكتم السر مفضوح
لا تلوم قلب جـر فيـك الأغانـي=حتّى الحمام يجرّه الشوق وينـوح