كل ما قلت الهوى منّه بأتوب=شفت زوله حطّه الله لي عذاب
مرّني عجلٍ على ذاري الهبوب=شمّني ريحه ومنه الراس شاب
طول ليلي ما تهنّيت بشروب=عايفٍ يا مير لذّات الشراب
شفت زوله وقت حزّات الغروب=قبل عين الشمس تنحي للغياب
قلت ريّض ثم وقّف يا امحبوب=بنتظر نقش الغوى نقش الخضاب
قال أخاف إنّك بقولك ذا كذوب=ما بتصدق في هوى ترف الشباب
قلت له والله عنكم ما بتوب=واعذابي من هوى تلع الرقاب
قال أنا ذبّاح سلاّل القلوب=من مشى في غيّنا ما له جواب
اسقني يا زين من ريجٍ عذوب=شربةٍ تجزى بها يوم الحساب
وارحم فوادٍ معلّل بايذوب=ضايعٍ متبايعٍ مغرم مصاب
من تبلّش بالهوي دوم امغلوب=كم غريمٍ في هوى الخفرات غاب
يو عرّض واعترض وأقفى جنوب=قمت أعاين وين مضراب الصواب
يا إله العرش غفّار الذنوب=ترحم اللّي يرتجي منك الثواب