لي الحال م التذكار متكدر الصافي =فلا طاب لي قوت ولا لذ لي صافي
هدا الليل واتهنت نياماه بالكرى =امقرين عين بالكرى يفنها غافي
وانا بت به بمجالب افكار كنها =دواليب تظهر كا متغبي خافي
وقلب اضعيف كم يشكي ويشتكي =من اصحاب وده ما صخوا له بلسعاف
طروب لسمع الصوت من مطرب الغنا =بلظعان والا عالى راس مشراف
خشوع ولوع كاتم زفرة الهوى =خضوع رحوم عن هوى النفس عفاف
فحتام يا وجت الجفا تبدل ابوفا =وتريع ليالي لي مضت منك سلاف
سعود الليالي الماضيات على الرخا =انودع رحيله بالتجلد ولحساف
ترى كل حد عنده اباطن الحشا =على الضامرات اللي لفن عقب منكاف
وانا لي محل حايزه من ابمهجتي =نزيل وطيات الجوانح له اسداف
ولو غاب عن عيني وفكري وناظري =اصور خياله بين عيناي وقاف
فلا الوم عذالي ولا الوم من وشى =غتيرين ما يدورون ما بي من اليافي
ايشوفون سلواني وصبري على الجوى =وانا عيل صبري والعزايم لي اضعاف
ولو كان في نفسي بغايا اتردها =بغاياه واما يطلبه خاطره كافي
شقاني ابكاس الود من وده الذي =دعاني أوده واشتهي وده الصافي
ولا لي من الخلان خل الوحدتي =سوى خلته فان شان فيه ولا راف
ومن شيمة المحبوب ظلم إلمن بلي =ابحبه ولا يدرج يزا حبه الوافي
فلما نظرته هم فيما يضرني =من انواع حبه لي بها ناوى اتلاف
فانا مستجير من بلاويه بالذي =يجير المخيف ابشوكة بيضها ارهاف
ابشخبوط منصى المنكفين من الخلا =على الضامرات اللي لفن عقب منكاف
نهنيج يا دار وطا فيج من سما =ابعلياه واتولى الحكم عقب لسلاف
ابدي خليفه والد لكل من غدا =خليفه أسود في المهمات تنشاف
كذا نجله السامي أديب له الوفا =محمد ومحمود السجايا ولالطاف
وهزاع هزاع المعالي له الثنا =وصفاط ما يغلا ولحاق ما ناف
وخالد زكي النفس والجود والسخا =له السيرة الحسنا مع الجانب الدافي
وزايد مسمى زايد عقب زايد =إمام وماخذ من سميه بالاوصاف
له النصر معتاد أبا الظفر والنبا= وفي الجود مسماي وفي ملتقى اللافي
جذا قال من يا عظ على كل من صغى =له السمع وامتدت لهم صفر لكفاف
فيا رب ول اخيارنا وامنح الرضا =علينا وسلمنا م لشرار يا كافي
عرفنا ايلنك خصك الله واصطفى =من اخيارنا صفوة اخيار واشراف
امتدت يداك ابواسع الملك واستوى =لك الأمر بالمعروف وصف م لوصاف
فيا مامن الديره ويا حامي الحمى =ويا مامن البادي ويا سور من خاف
ويا حايش الطوله ويا نايش العلا =ابشبر غدت لشبار من دونه اشفاف
تبصرت في باجي ملا كن وصفها =انيوم امطفي نورها بدرك الوافي
معالي ايدود ما عفا الدهر رسمها =مضى عصرها والرسم باجي وينشاف
ولوها ابصنع الهند والسيف والجنا =وشبان تسبق للمنايا ولا تخاف
تعلوا ظهور العاديات ضحى اللقا =وحمر تغير ابحزة الكون بارداف
وكم اقطعن من مهمه موحش الخلا =نهار وليل ما يملن م لصلاف
دعن الليالي مزعجات بها القطا =تعذر منامه من سمع هيس لخفاف
ايلين استدانت واستذلت وطاوعت =اصعاب العدى وادت اما منها اشتاف
ألا يا ولي احسان حالي وحالتي =ويا ظل ظلي من هواجير لصياف
فانا عقب دار كان لي ماضي بها =ربا المهد وارداها على يا نبي ضافي
وطن من بنوا فيها وشادو وشيدوا =اركان المباني والهم الوجت مسعاف
سوالف يدود ضمها باطن الثرى =ابلرماس واردود التراب الهم الحاف
تعوضت دار شفت لحسان باهلها =اكرام وكانوا لي بلحسان حفاف
اصغار النفوس المن بغي ايحف بارضهم =سماح الخطايا يا كثر مهم العافي
دفي الجناب ومن معه كسب الثنا =اخوانه وهم له في المسرات سعاف
فيا الله يا من ينزل الغيث م السما =م لمزون برعود لها البرق رفاف
تضرعت لك يا رب في مدهم الدجى =تجيب الدعا وانته رحيم ورواف
تسلم لنا حكامنا واهل أمرنا =وتحمي ابهم دار وتامن لها اطراف
ابجاه النبي والآل الصحب ما نووا =الى البيت حجاج تلبي وطواف
واعداد ما بالطرس نختم اما بدا =لي الحال م التذكار متكدر الصافي