بيان من نظم القريض يدور =مني على صفحه حبرها نور
نور المعاني والكلام الطيب =يبقى على مر الدهر مذكور
فصلت تنظيمه وصغت الفاظه=بإسلوب لا وحش ولا منكور
قلته لمن هو يستحقه و أوفر =معناه عن معنى كلام بطور
والمدح لأهل المكرمات معود=جايز ويفرق عن مديح الحور
والنفس تاقت والفؤاد ترنم=في مدح شيخ ما عليه قصور
ما عاب من قلبه يود شيوخه=وبهم بدا بين الجميع فخور
سلطان يوم سمعت له من غيري=مدح يخلي باغضه مقهور
ويبث في قلب الصديق أفراحه=واحنا لهم خبر الجميل ندور
سلطان يا شيخ العلا عنيت له=بالغ سلامي بالثنا وحبور
طاريه بالعليا وهو صاحبها =صحبة وفا ما هو بصحبة زور
من يوم توه في المهاد اتبين=أنه صقر مربا حرار صقور
سماح زلات القصير بطيبه=وطبعه لزلات اللزيم غفور
نقال ما يعجز نقوله غيره=وقلبه على حل الصعايب جور
طلق المحيا دوم وجهه باسم=صعب العتاله ما بعظمه بور
كل المحامد والأفعال الجيده =طاول كما يمها طويل شبور
يبدي الجميل بكل ما في وسعه=ومن حلم معن ماخذ الدستور
للجود من كفه مغاني فيضها =ضاف على كل البدو وحضور
شب بثبات النفس في عزاتها=ما هو على تيه الزمان غرور
شيخ على الطبع النزيه تربى =وقلبه على غير النزيه غيور
إن جيت لا يذ في طنوب حمايته =تلقاه بك لطف الجنان وقور
ما رد جافي من عني له شافي =يلقى فضل وافي بغير قصور
هذي فعايل بن خليفه السامي=سلطان يانعم الفتى المشهور
زانت اخلاقه للبرايا كلها=ولا زال بجلال الثنا مشكور
من لابة تروي الهنادي ورودهم=والدم من صدر الغريم يفور
والخيل تفخر يوم فوق سروجها=منهم شباب الثابتين تدور
والسيف يروي والعدو يتلاشى =والشهم ثابت والجبان يخور
هذي عوايد سالفين اجدادكم=وانتو لهم نعم الخلف ياصقور
حوزتوا الناموس لنهيانكم=واحيا بكم بين الدول مسرور
ما قلت مدحي غير أنا متأكد=المدح يا سلطان فيكم نور
انته كفو للمدح وأكثر منه =يابن خليفه ياجليل الطور
تبقى لنا ظل ومرد دايم=في عز ما تذري عليه دبور
يا ولد بن زايد رئيس الدولة=تحيا طويل العمر تحيا سور
تحيا قمر تحيا مطر لديارنا=يا خير بر بخاطر مبرور
الله يدفع كل شر عنكم=وتدوم ياشيخ بهنا وسرور
وتنال مقصود المراد وغايتك=في كل شي تهتويه يصور
ختمان ما قلته عليك مثنى =تسمح لما تلقاه من لقصور
وصلوا على طه النبي لمشفع=في يوم تعرض للحساب جسور