خفيف الدم يا حلو الدلاعه=أخذت الحسن وأكملت انطباعه
أبادلكم ودادي وانطباعي=وترويني صدود وامتناعه
بودي إن حصل يا ورد منكم=لقا الأرواح لو في العمر ساعة
بكم يا بهجة فوادي اتهنى=ويا نور بصر يزهي شعاعه
أنا ما تصدني عذال عنكم=ولو يوني جماعه مع جماعه
لا بشوفكم تحيا حياتي =ويرتد النسم عقب انتزاعه
أصارحكم وأبي منكم صراحه=وهذا شيء واجبنا اتباعه
اذا كملت لي مطلوب قلبي=بوصل دون غيبه وانقطاعه
تراني لك مليك طول عمري=ولا اقبل دونكم شفع وشفاعه
أنا ما أصدق أن الحب يفني =ولكن ضاع فنه بابتياعه
تلادوه البرايا بالدراهم=من التعديل صاروا في ضياعه
سعادة من يريد الحب يبني=وداده بالتعطف والقناعة
وصنع الحب ما بين الثنينه=كما صنع المصانع للصناعه
يكون بخسر واتعاب وكلافه=لحتي يذوق راعيه انتفاعه
وأنا وضحت لك يانور عيني=يا كيف المجتمع يبني اجتماعه
ولا يهزم غريم الحب قلبه=لان الحب يبغي له بزاعه
ويطلب حب واخلاص وتفاني =من القلبين في بر وبراعه
إذا ضرس الطمع بيكون طايح =من الجنبين مقلوع انقلاعه
يكون اليوم ذاك من السعاده=وفيه الحب يسمو بارتفاعه
أنا في جو لبنان المغذي =ولكن خاطري معكم رتاعه
عديل الروح يا زد الحبايب=فراقك زاد لفواد التياعه
عسى الله ما يكدر كل منا =لنكمل ما بنينا بالسراعه
وعسى أن رجاي فيك يكون وافي=لينتج حبنا حلو الزراعه
وجني كل طيب من ثماره =ونجعل ضدنا يكثر صراعه
ونحيا بين حب وجو هادي =بوصل وإنس من غير نقطاعه