قصيدة ( الغيه )
الشاعر : محمد بن عبيد بن نعمان الكعبي

جيت للغيه وشفت اللي رماني=باللحاظ اللي كما السيف اليماني
والهدايب فوقهن سوى زفاني=والصبي مثل النهر تحت النجومي
بي فيه وابتهت قلبي وراحي=من عيون لحظها يذبح ذباحي
لو ترفق بي ترى يبري جراحي=بو ثمان كنها نقش الرقومي
حار كل الناظرين ابزين شوفه=والمثايل جاتني تنعت وصوفه
يابخت كف لمس ناعم كفوفه=مس هاذيك الروايب والختومي
البدر والورد صاروا عاشقينه=واقعه لمشاجره بين الثنينه
ع خدوده ووجناته مع جبينه=والدجي في الراسي يسحب له اردومي
من حدر راسه على متونه ردايم=ضافي من فوق لخصور الهاضيم
ما قدرت أشد حيلي والعزايم=واترك اللي فايق ريم الحزومي
تاح قلبي في مهاوية المحبه=واستباح الحال بعده بالمحبه
يابخت لي مادرى كيف المحبه=عاش دايم من مخاطرها سلومي
شل قلبي من ضمير الجوف عني=ما بقيت الا جسم خالي أوني
والجروح اللي تركهن عذبني =واجعلني غادي ما أروم أقومي
كيني حبه كما كي المياسم=واستوى لي في وسط لفواد راسم
ما شفايه غير هاذيك المباسم=فيه صحة حالتي وابرا سقومي
العيون اتهل دمعي بالنضايح =والحشا من زود حمل الهم طايح
والفكر في مهمه الغيبوب سايح =رايح والحب لابن أدم ظلومي
التقري ما شفاني والتداوي=والتمني ليس ينفع والرجاوي
غير كانه سيدي يرحم وياوي=يفعل المعروف ما ينقل وثومي
بالحنان إيرد لي ويا الزياره =والموده بونها ما مستعاره
منها ساس التأدب والحضراه =كشي بالوفا ما فيه لومي
شافته لعيون مني بالبعايد=يوم ثار ولد لفت الشوف عايد
بس شفت الوجه منه والنهايد=مقدمه لما عزم سيدي يقومي
قلت يا رب البرايا شوف حالي =من جميل ساق حالي للزوالي
هكذا تخلق على الدنيا غزالي=أه ياليت انظره في كل يومي
ذاب حالي في هواه وصرت هالك =والهوى كم تاح غيري في المهالك
لو دعاني للوصل وامسيت هالك=والهوى كم تاح غيري في المهالك
لو دعاني للوصل وامسيت هالك =كان ذاك اليوم عندي خير يومي
اعرفه بالشوف لي شفته أمامي=بس ما دل المحله والمقامي
مع نسيم الصبح بهدي له سلامي=يوصله ويبث له حالة علومي
أعرف أنه من شجر داري وطيبه=بوظبي أغلى وطن معنى حبيبه
ليت هو قربي وانا ساكن قريبه =كان طاب القلب وانزاحت همومي
بن وقيش بذي الشكيه قاصدنك =والحقيقه ما بخفي شي عنك
حيث لنك لي سناد حاسبنك=بالنوايب لي حدث شف ولزومي
والصديق ابحالته يخبر صديقه=والرفيق بلازم ايشاكي رفيقه
والعلاقه بيني وبينك وثيقه =والرجا تبقى على التطوير دومي
انت عندي من الربوع اللي نفايل=اقتدي بالشور منك والدلايل
والرجل ينصاع لرجال الصمايل=وانت شورك كم فرج من غمومي
سو لي راي واشرح لي نظيره=حالتي ياذا اللخو صارت خطيره
من هوايه بو نهيدات صغيره=بوخدود كنها برق الغيومي
يعلم الله ما خفي في القلب غابي=اشتكي لك من صوابي من عذابي
من غضيض العود مليان الشبابي=ليت قلبه يستوي حقي رحومي
عقب هذا نرتجع لين النهايه =يوم غية زيكم جابت بلايه
وانت مابين الجماعه واخويايه=لي لزيم ما تهون بك عزومي
ذا وصلوا عد ما ناطق وساكت=ع الذي يشفع لنا والكل ساكت
في المثل ما حد درى بحوال ساكت =يوم ما ينطق يلو بالكف يومي




قصيدة ( حيب بن نعمان )
رد الشاعر : سلطان بن وقي الظاهري

مرحبا ما هب ذعذاع اليماني=أو عدد ما ناح طير ع الغصاني
أو عدد ما خططوا بالزعفراني=ع الخدود الناعمه في كل يومي
حي بن نعمان في معنى كلامه =عد ما نور تبسم من ظلامه
أو عدد ما هل وبل من غمامه=كمل اسبوعين وايامه عتومي
حي من جاني معنى لي شكيه=قاصد صوبي يعرف إني خويه
يشتكي من حب معسول الشفيه=لي نهب قلبه وهو منه محرومي
كف يا محمد دموع الحب عنك =خلنا نبحث عن اللي شاغلنك
وانت لي صابك ترى يصطاب منك=عادة العاشق لمعشوقه فهومي
بنعزي له ناس م اللي يعرفونه=وان ذكر في الدار لازم يوصفونه
وان حصل بنسوق لو يغلى زبونه=من حلال وما وارواح نسومي
حاضرين بكل وقت ما تبانا=حاملين سلاحنا نرمي عدانا
بنعزي الشبان وربوع اخويانا=لك يابن نعمان بالواجب نقومي
وان سألت الحب انته عارفنه=يسلب العشاق واللي داس فنه
والعذارى كم صبى ولعنه=واجعلنه في بحر حبه يهومي
تايه ما يدل دربه وين رايح =في هوى الخفرات مع الأيام سايح
ما صغى للقول والا للنصايح=لا يعطي خبر ولا يأخذ علومي
غير كان محب قلبه صافي له =لو يطول الشوق عنده ما يمله
يا هنا خل تهنى بشوف خله=في ظلام الليل والعالم نيومي
كل منهم يشتكي من عوق لا خر=وكل منهم ياتي إما كان ذاخر
والمحبه بينهم تشحن بواخر=تبري العلات كلها والسقومي
أما لي ينظر نديم وسط غيه=يصبر ولو جاه كي فوق كيه
حيث لن الحب قاسي ما بشويه=وانت صبرك بالوفا وابقى حلومي
كان صبته مثل ما هو صايبنك=بيحصل لو طال ما بيخيب ظنك
مثل ما شفته ترى هو شايفنك=والحواجب بينكم تقضي اللزومي
بيحصل لو طال صبرك مع عويلك=لو هجرت النوم في يومك وليلك
وانت بو نعمان ياما قد غدي لك =من ليالي الحب وانت بها كتومي
قوي عزمك لو اتزايد بك همومك=والا ذاعه عنك باتنشر علومك
ومحبوبك عاد ما ينقل وثومك =لي سمع علمك ترى يبقي محمومي
لازم يصطاب مهما كان قاسي=والهوى جبار يخضع كل راسي
خص كان هناك له سابق أساسي =ينضرب قلبه برهفات السهومي
وانا مثلك صابني سهم المحبه =وجعلنيه طايح في وسط غبه
من حبيب شط قلبي بالمحبه=مارحمني بالهوى يعله يدومي
شاقني حبه من ايام الطفوله=لين هذا اليوم عام دار حلوه
صابر محتار والروح معلوله=والجفن من زود همي عاف نومي
من هوى زين شغف قلبي بزينه=ناجي ما سولفوا فيه الثنينه
ليت بس الحب ما بيني وبينه=ينقسم ويكون حاكم ومحكومي
بوعويد نحيف والا الطرف مالي =شيفته من البعد تشبه كالغزالي
نو خده بدر لو برق اشتعالي =نابي الردفين الوخصر مهضومي
له علي عهد ما بدل بغيره =لو قسا قلبه وانا اعواقي خطيره
كاتم ما ابيح بقاصي السريره=غير قولك هاضني وجدد رسومي
وانتهيت أنوح من جرح تجدد=ينشر اعلانات في الدار ويهدد
كل ما قلت أه قال لي بعد مدد=والصبر من وانا لك دوم دومي
قلت له ما يفيد صبري ياغناتي=غير شوفك بس ما دامت حياتي
وانت وصلك صار في الدنيا شفاتي=من احسانك عاد لاتغدي شؤومي