قصيدة ( استاذ في نظم لنشادي )
الشاعر : سيف حمد الكعبي

تغفى عيونك بالرقادي=وانا عيوني محاربه النوم
سبة إفراقك والبعادي=أبات في شطات وهموم
قرار خذته بانفرادي=وانا بقرارك صرت مظلوم
ما تخاف من رب العبادي=يللي احكامه بالعدل دوم
طعتك على كل المرادي=وكنت لك في كل ملزوم
وجازيتني بكثر الصدادي =وكثرة اعذاري ما لها لزوم
وانسيت ميثاق الودادي=ودرب الهوى لي كان مرسوم
وان كنت ناوي لي نفادي=مترى الأجل يازين محتوم
لاخير في كثير العنادي=وحبل الموده خله ايدوم
وعسى ان نار في فوادي=تشعل بصدرك لو ضحى يوم
واحيد لي شاعر اسنادي=زعيم في الثيبات جيدوم
مشهور في كل لبلادي=وعند العرب تلقاه محشوم
مرفوع قدره هوب عادي =وعند الثريا منزله دوم
استاذ في نظم لنشادي=وله في البلاغه قول منظوم
بوجسيم قصدي والمرادي =يثيب في حزات لهموم



قصيدة ( ياسيف يا ركن اعتمادي )
رد الشاعر : محمد بن عبيد بن نعمان الكعبي

يا مرحبا بزقر لمنادي =زقر يوقظني عقب نوم
ترحيب مني بالهبادي=ما ينحصى بحساب ورقوم
بعداد منشور الجرادي=واعداد قطر امطار لغيوم
مخلوط من مسك وزبادي =بالنرجسي ورياح مشموم
واعداد نسناس البرادي=كوس وطت فيات وحزوم
ياسيف ياركن اعتمادي =ياسناد لي من صار ملزوم
بو هناد يا خير العوادي =يا مبتعد عن شاني اللوم
يا الشهم يا عرب الأجدادي=غالي وقدرك دوم مكروم
اشكيت لي عوق الودادي=يللي دعاك بحال مظلوم
من حب مزموم الأنهادي =غض الصبا والخصر مهضوم
يشبه على ريم البوادي=لي مرتعه في روض لوسوم
شوفه شفا سقم ليهادي=غر يسلي ضيج لهموم
يا ما حلا توحه الأيادي =بخطاه يوم يثور ويقوم
ابشر وانا لك بالوكادي =اثور بالمايوب ملزوم
حتى يلو يوقع نفادي= في شف قدرك مرخص السوم
بالمال وبعسم الأيادي=نرضيه خلك بالوفا دوم
يطلب وياخذع المرادي=م المال والأ نجيه بالقوم
بنجيه باخيار العوادي =لي ضربهم تالف ومسموم
وان كان ما تمت وعادي =يعلي عسى م الزين محروم
ربي عسى ضدك نفادي=ويتم بالحسرات مكظوم
ما بين حضرك والبوادي =بالسعد والتوفيق لك دوم
والزين حقك باجتهادي=تبقى ثوابت حبه رسوم
ويزيح من قول الأعادي =وعنك يفرج ضيج لهموم