حي السجل وحي نظرة اقباله =يللي حمل في طيته عدة سوال
حيه عدد ريف الجنوب وشماله=اهلا وسهلا عد حل وترحال
يللي لنا القرم النجيب انتقى له =وتخيره عنه نديب ومرسال
في طيته يذكر لنا ما جرى له=إلنا زملاه وحب يشكو لنا الحال
يشكي من اللي تل قلبه وشاله=ترف الشباب اللي بالعيون غزال
فايق على كل الرعايب جماله=ما حط من تحت النواهيد شيال
صابه بصواب ما يحصل شفا له=عند الطبيب إلا سويعات الأوصال
من دون وصله ما يطيق احتماله=يللي لبس ثوب مطرز بالأشكال
يابن هلال المشتكي في مجاله=وحنا حضور لك على كل منوال
وعن لا يخامر خاطر لك خياله=انت الأبو فينا ونحنا لك عيال
ولا فرق ما بين الأبو مع عياله=الشمل منهم جامع لكل الأحوال
كان اطبعوا ولا في بر السهاله =كل الهدف واحد والأثقال تنشال
بين الجماعه ما تعضل الثقاله=وللي تحبه ما تخليه لو حال
دونه صفوف من عظايم أبطاله=والموت سوى من على الروس أظلال
بانلتقيه بطيبات اللقا له=بنفوس ما هن عن لقا الويه يفال
هالمجلس اللي لم يجمله ارجاله =فيهم كهول الرأي يهدون لأشبال
أولاد منصور الرجال السلاله=ظفرين في يوم به الموت نزال
كم من خصيم ما تحصل مناله=فيهم ومنهم شاف غصات الأهوال
وبه من بني ياس رجاله الكماله=ما خص منهم حد اعني بالأجمال
كل واحد منهم يعرف العنى له =لني بهم صف ولا هناك عزال
والظاهري متمجدات فعاله =من سالف التاريخ والحق ينقال
نمشي بأمر الشيخ يللي مقاله=ما يتخلف ويخلق لي راد الأقوال
زايد عقيد الكل في كل حاله=لا مره نطيع ولا نخالف لما قال
ليث المحن عز الوطن تنخشى له =ضربات عزم في انتقام يلي صال
بالخير مهد واخبث الوقت زاله=عنا وبلغنا المقاصد والآمال
عمره عسى ربي يطول مجاله=يبقى على مر الجديدين لا زال
كل واحد واجب يقيم الدعا له=باني لنا النهضه وللخير فعال
ويا بن هلال اللي يسالك تساله=وهذا سوالي طارحنه بلمثال
عن بنت عذرا كالبدر في كماله=من اربع الوجهات تلقاك باقبال
وتقبل العشاق كل بحاله =ومنها يحصل كل سايل بما يسال
وبنشدك عن مخلوق ما حد مثاله=طيلة حياته في غياهيب الأرحال
لا نوم لا راحه ولا فيه هناء له=عطني الفسر يازاكي الجد والخال
تمت وسمحوا في الخطا والخطا له=وعدلوا لما تلقون يا أخوان ميال
صلاة ربي عد نظم المقاله=توصل شفيع الكل في يوم الأذهال