قم يا نديبي ود خطي لجنابه=راعي السموت اللي ضفى الكل طيبه
القرم ولد القرم رجل الذرابه=نجيب ربته الفروع النجيبه
راعي المقام اللي مفتح أبوابه=للضيف وصنوف الكرايم عجيبه
يلاقي ضيوفه بالوفا والرحابه=مواقفه حق المعادي مهيبه
من لابة تثبت بيوم الضرابه=سرع المثابة يوم ينخى يثيبه
كن القمر في كامل النور بابه=تعلوه ما بين الرجاجيل هيبه
كساه ربه م السخاوه ثيابه=حيث الكريم الله يحطه حبيبه
بن فاضل الفاضل زكي النسابه=بيت النقا ما شق بالعيب جيبه
فاضل عسى عمره بعيد المدى به=يبقى عفي الحال شاب وشيبه
عنز على طلاب المعالي ركابه=ونتاش بيده كل عليا صعيبه
شهم تعود بالضراوه عتابه=نفسه على الشدات عزما صليبه
يقطع بثقل الحد مع قو لابه=يوم اللقا معهم تقر الضريبه
غنى له اليادل غضيض الشبابه=يللي عنوقه مثل نزاغ حيبه
راسه على متونه طويل انسايبه=فوق الخصور الناحلات القبيبه
وان داس بأقدامه محيل الترابه=تازم من أقدامه ثراها عشيبه
القلب ما يقدر يثبت متابه=من دون شوفه بو غصون رطيبه
من طيبها والزين كل حكي به=وربه عن عيون الحواسد رقيبه
اعذر وسامح من كلامي عتابه=والشعر لازم فيه خطله وصيبه
سلام لك شروى غدير السحابه=واشذى من المسك المعتق وطيبه