اذا شام مملوك الحشا عن حبايبه=تذكر لهم مع كل طالع وغايبه
تذكر لهم والدمع سباق ينهمل =كما هل سيل من كنايف سحايبه
قداهم حنى الفواد حب اذا لمس=صم الصخور أمست من اللمس ذايبه
عزاز يعزونه ويفدون شيفته=بنفوس في شفه تقدم وهايبه
اذا غاب عنهم طيبوا طيب سمعته =وعفوا عن دروب الرزايا ترايبه
وقاموا بما يوجب عليهم وزيدوا=من شان جاهة ما تكدر رغايبه
يباهي بهم في ساحة العز والشرف=مباهاة نفس تجتنب كل عايبه
لهم في سواد العين مسكن وفي الحشا=بين الضلوع مشيدات طنايبه
بيت نظيف ما سكن فيه غيرهم=وما كدره ذاري ذواري هبايبه
يلو قلت ما قلته بعدني مقصر=عن من ملك قلبي بقلة عتايبه
وعتهم والدمع منهم يغطني =كما غط غرقان البحر في غبايبه
سلامي عليهم كل ما شمس نورت=ع الكون وأبدت في نهى اليوم غايبه
تحركت بالرحله من العين موطني =دار بها كل المحوجين لايبه
دار الشيوخ أهل الصفات لمكمله =تاريخهم في المجد تنور كتايبه
دار يذري كل مظيوم جاهها =ولها ترى المحتاج زمع ركايبه
تأخذ بحد السيف من كل من بغى =عدوه عليها حاقد النفس خايبه
حكمها شمس وغيث وملتجى =عن اللاهب الحارق وعن كل شايبه
لا بة هل نهيان لابه تميزت =تاريخهم نوه بوافي عجايبه
على رأسهم زايد حمى الله كلمته =من الزلل والنقص واكرم وهايبه
تربى على فعل الجميلات وانتشى=وهبه من الله جات للخلق ثايبه
عسى صحته دايم وعمره إلى الأبد=ويبقى مدى الأيام ما تجيه نايبه
سقى الله بلادي يود متكامل الحيا=سحب تسوقه تحت ريفه هبايبه
يملي شطوط البر والكل يرتوي=ويطيب في كل المفالي عشايبه
تلقى حسين العود للبر مرتحل =يشتم طيب زهور يابه سوايبه
شروى صباح النور خده إلى قبل=وان صد مقفي سترنه ذوايبه
غض يغار البان من غض نشوته=ويتفاخر الحنا بزاهي روايبه
لو شاف زينه راهب الدين ماملك=عقله ولا كمل فرايض كتايبه
من رتع الغزلان والريم والمها=قطعان تتياول على كل رايبه
بالنوم واليقظات ما حد يغثهم =في مامن ما حد يزعزع نصايبه
ومن بعد ذا رديت قيفان رحلتي=والعوق وما سببت لي سبايبه
على سمعة أمريكا تنويت مرتحل=في جوف سباح الهوا مع سحايبه
عليها علم داري واسمها يعزني=وأنا منها مبسوط والنفس طايبه
وعندي شباب يفرح القلب شوفهم=صقور السما في يوم توقع حرايبه
معهم عزيز الروح يرخص مع اللزم=فخري بيوم فيه توجب موايبه
وصلنا إلى (شارولت) وهناك حطنا =ركب السفر حلت نواصي ركايبه
نزلنا بفندق فيه ما يعرف الكرم=ودوبه على الضيفان ركز ضرايبه
جمعنا كريم الجود باجواد لمنا=وياهم مقام فيه قاموا بواجبه
سخاهم ينسي كل معلول علته=ويبدون من حسن التعامل غرايبه
عليهم ثياب الطيب والزين والسخا=زين ينسي كل غايب حبايبه
وأنا منهم في كل واجب اتشكرت =نفسي وهم فيما يحبون ثايبه
الوقت يمضي والدهر كن ساعه=ما بينهم والأنس باسط ذوايبه
ربع بهم أنست قلبي وفرجوا=عقدة هموم فوق لفواد راكبه
عسائي وعساهم من البعد والنيا=كل واحد منا يحقق رغايبه
نلقى الأهل بالخير وافراح كلنا=وكل سليم من حوادث عطايبه
طالب كريم الجود ربي يردنا=لديارنا بالخير من دون صايبه
ختامي مثل ما قلت في بادي المثل =ماجور محبوب يودع حبايبه