يالله ياراعي على كل راعي=يا شامل خيرك عموم البريه
لك منزل مافي عليه ارتفاعي=فوق الجميع وكلنا لك رعيه
يارب ملكك ما يجيه انتزاعي =والخلق عندك في العدالة سويه
تقبل دعا عبد توسلك داعي=يطلبك يارب الكفوف السخيه
فياض جودك ما عليه امتناعي=قادر ومخزون الفضايل غنيه
سقت الأمل حيث أن ليك ارتجاعي=وانت كفيل بكل حل الكشيه
ضاق الزمان وضاق منه اتساعي=وين اتجه لأن اتجاهي خطيه
وأني لغيرك هوب رافع ذراعي=متسول حاجه وطالب عطيه
أقول ذا وانت عليم اطباعي=علام بأسرار القلوب الخفيه
ما بي عسر قلة ارزاق ومتاعي=فضلك معي وايد وكافي عليه
شكواي لك شان الفضا والمراعي=قل الحيا وأرضك تراها حفيه
موت النوامي والبهايم جياعي=ماسدهن منا طعام الشريه
وانت بنا أرحم من أم الرضاعي =لك مقصدي وجعت من خالص النيه
الا تحوجنا لسيل الصناعي =وانت معك سيل المياه النقيه
ما يثبت اللي بالدراهم يباعي=يعبر كما تعبر بكور وعشيه
محدود مردود بدون انتفاعي=موجود معدوم بركاته خليه
لا بد من بوم يجيه انقطاعي=وانت على خلقك عطوف الحميه
عطنا مطر من مدهمات وساعي =يرزم فحلهن بالصباح ومسيه
يا ما حلا منهن نظيف القناعي=وعيونهن تسكب دموع هنيه
فيهن سنا البارق جميل الشعاعي=يا من ازين شعاعه بليل عشويه
من صولته يبكي كثير الأدماعي=تروي ولا تترك ديار عطشيه
تخضر من خطره حزوم الرفاعي=والمنحدر تازم زهوره شذيه
ترتاح بانعامه كثار السواعي=تسمن به ضعاف وتازم قويه
وأنهارنا ما تتسعها الأواعي=من منتك يارب تبقى مليه
وأنهيت ما قلته بحسن اتباعي=منهاج هدينا شفيع البريه