البارحه ما ذال يفني بالكرى =والعين ما غضت ابطيب منامها
طرا لها ما بالفكور وسطرت =جيل ومرسوم ابروس أقلامها
من عقب ذا يالطارش اللي عاني =منا وعني بالطرس وارسامها
اتود نفسي بالمسير ابصحبتك =لوما العذار المانعات اعزامها
يود على خيرة حلال نجيبه =سمهاية متباعد درهامها
مامونة من دابها سير السرى =في ليلة يالي النيوم ظلامها
سباحة لماحة زول العصا =متاحه غزل الوشيع اخطامها
صموت ما للساريين أدرى بها =تنسل ما اتوجد العين يهامها
علكومة مصيونة مطعومه =وامشمخ خلف الشداد سنامها
ما ضمها المكري لتيفان الكرا =والا ابطروى السوم حد سامها
هذا ولي منك ابكورها =وانويت م الديره عزوم مشامها
دوس الطفوف ابها تشوف عوادي =رسم الهيان الواطيات أجدامها
يوم القلوب امن الكروب سوالي =بركوب قطاع الخلا واهمامها
يداقلن واصموت غير اللي لها =ركاب تتخاير ابطيب كلامها
لي يزت ممدود الطريج ايبين لك =زول الديار ومدهمات اعلامها
دعها زروف ولاتعوي طريجها =دون الويوه الطيبين اكرامها
اهل النوادي لي امديم نزيلها =واهل المكارم لي اتعد انعامها
بتشوف ذربين الفعال وحفهم =بازكى تحيه بالعبير اختامها
الطايلات اشبورهم روس الذرى =والنايفات اقصورهم واشمامها
خص المطاع الشيخ مرفوع النبا =اسعيد واثنه للعيال أشهامها
واختص شيخ ما يمل جنابه =راشد وقل له عقب رد سلامها
يا ولد زاكين اليدود ومن لهم =روس المعالي قابضين أزمامها
مبروك ما دبرت واعطيت الهنا =والسعد واتوقفت سعد ايامها
يعلك اتشاهد في ضحى يوم اللقا =حال السرور ابنظرة بسامها
الكل من بيت رفيع ومنتمي =من عنصر عالي ومن حكامها
عرس سمعته كل من يخبر ابها =وايعد ما لا تحتويه افهامها
ابسنة الرحمن واما به قضى=دين الشريعه واقتضت علامها
هذى عواديد من امطيع ومن يبا=حفظ الايمان وواجبات اسلامها
وازكى صلاتي ما همي وبل السما=على النبي خير الورى وايمامها