بدا من قال بمثال =زهت برسومها السجل
عنت إلمن يخص ابهن =فتى ولوالده نجل
عقب ذا يا نديب لي =ترحل لا تكن مهل
على حمرا زهت بالشد =وزان اشدادها الرحل
تفي الدو بنو القو =فيوى البر والسهل
ربيه مبطيه معنا =اتلاد الأم والفحل
خذت م السن فوق السن =خمس عدها كمل
تحمل يا نديب لي =سلام ما همي الوبل
على من هو لنا ذخر =شريك الفرع والأصل
أخيك ان سلت عن حاله =بأنعام لها فضل
فنحنا يا محب الكل =ما كنا عنكم نسل
عن الديره اتحولنا =لدار عذية النزل
منازلنا بها شيدت =على عذب النقا النشل
انلاجي زول ناصينا =ونفرح لي بنا حل
وحال سر به قلب =امرب في هوى الخل
انداري له ومطلوبه =علينا هين سهل
كحيل الطرف له عين =زهت لو ما بها كحل
وجيد كامل زينه =ولو ما يلبس الدل
نشا عوده وله عود =كمل في غاية الحل
تبن الريح من ريحه =ابريح المسك والفل
تمكن م الحشا وادعى =على من وده الذل
امكف النفس عن غيره =حتى انه عندي الكل
ودم واسلم على خير =على قرابك ايطل
ختمنا الجيل وانصلي =على احمد خاتم الرسل
عدد ما خط بمثال =زهت برسومها السجل