يا الله يا منزل غزيرات الامطار =يا من له الدنيا ويا من له الدين
يا خالق الجنه ويا خالق النار =ويا من له تخضع ارقاب المصلين
تنصر لنا زايد على كل بوار=يا منزل جزو تبارك وياسين
شيخ على شعبه عطوف ومدرار =مثل الحيا يحيي ديار المحيلين
ابو خليفه كاسب المدح والكار =زايد إلي عدت ملوك السلاطين
كم انفقت يمناه درهم ودينار =كم دوله سند لها بالملايين
وبثلاثه وسبعين سجل له اذكار =وقف حقول الزيت ضد المعادبن
حر على العليا جزوع وصبار =مفراص ماس يدعي القاسي يلين
زابنك من حظ تردى وبي بار =وانت الذي عاونت حظ المساكين
كم واحد ما حط في البنك دينار =واليوم وسط البنك يملك ملايين
لا جابها كسب ولاجت من اسفار =جت من وجودك والسبب م الاراضين
وارضي غدت من بين عاذل وشوار =وارجو الفرج منك عسى عمرك سنين
خذوها ولاخلوا الا عشرة أمتار =ومن أول مكزوزة إميه وخمسين
عطية منك لاجل خمسة صغار =ما يقدرون بشي عدهم صغيرين
وفتحت باب الخير لكل الاقطار =وعمرت بلد دامرات من اسنين
وغدا بر بينونه تلامع به انوار =ومداين تبنى ومساجد للدين
من عقب ما يرتع بها خل وعشار =اليوم فيها من الحضارة نياشين
وابوظبي صحراه اشجار وانهار=وخطوط قار ومدن للمستحقين
زفيتها للمجد من بين الاقطار=واصبح تهنيها ملوك وسلاطين
وانتو هل الطولات وانتوا هل الثار=لي جاكم اللي وسط راسه شياطين
هل سربة تورد على العدو بمهار =وصقلات تنجسى للمعادين
لولاك ما صرنا على الأرض واحرار=ولولاك ما قلنا نحن شعب حرين
هذا وصلى الله على سيد الابرار =محمد اللي خاتم للنبيين