مرحبا بالقاف وفنونه = عد الأرض ومن مشى فيها
والحرم واللي يطوفونه = من جنوب ومن شماليها
بالزعيم اللي يدارونه = حاكم الديره وراعيها
يعل والي العرش فى عونه = وكل طلبة له يلبيها
خص بالخيرات بينونه = والقرايا لي حواليها
شيخ ساس المجد من بونه = هوب توه مبتدى فيها
يا تراب الحكم وركونه = يعل تسفر لك لياليها
طلبة من صدق مامونه = من صميم القلب نهديها
سعد من في داره تيونه = لو محل يخضر واديها
والحمام يردد الحونه = في زهور فرخت فيها
يتمنى كل مزيونه = في حضن ناس تغذيها
لي من الهنات مصيونه = والنزاهه من طواريها
أمركم للي تريدونه = في مطالبكم يمشيها
وفضلكم لو عد يحصونه = زاد ما تحصى مناشيها
مثل غيث ترعد مزونه = سيل الرمله وواديها
واصبحت الارزاق مضمونه = الأمن والمصلحة فيها
فضل زايد لي يعدونه = لي رقي بالمجد عاليها
عيدكم لي عاد فى سونه = واتحاد لم اياديها
يعلكم كل حول تلقونه= في سرور وفي تمانيها
والخواطر هيب مشحونه = والفرح والنور غاشيها
والصلاة الفين مقرونه = للنبي وختام تاليها