الطير يا خالد خذوه المناعير=أشقر وجاني من لزيمي هديه
من شبته ما لعوزوه الصقاقير=يوم انتوينا مع زبون الونيه
يلحق طيار وفاصل في المخامير=هيف العزوم اللي يقاع خليه
من عند قرم ما يحاتي المخاسير=اللي على العليا عزومه قويه
في المجد حطوا له كنوز وتصدير=ويمناه في مد الطايا سخيه
ينسب لها اللي هملوها المثابير=اللي بعضهم ما يقدر خويه
حر رقى في عاليات الشناظير=والمرجله تاتي حظوظ وعطيه
وصف بها راكان وكليب والزير=وسجلهم تاريخ حي الحيه
والاعمار في الدنيا تراها مشاوير=وخسران من يركب ذلول رديه
وان ما ثنيت الحبل ما نلت م البير=شربة وعلات تكرر هنيه
وخل الردي وياك واصحب هل الخير=تلقى السعد عند الوجوه الرضيه
واحفظ زمام النفس في الفعل والسير=تكتب لك الحسنه ونمحى الخطيه
والرزق عند الله لي مرزق الطير=والدود في لجات بحر طميه
وزاد العنا بي يوم ذبيت لعصير=في مرقب منقاد والشمس حيه
وذكرت سجات الليالي المدابير=وحلو السجايا بو عيون دعيه
اللي عليه القلب يوقد شرى الكير=قايد خشوف الريم بارض عذبه
أبطيت منه ما لفتني الأخابير=وانا الذي لازم وصوله عليه
الجادل اللي دمر القلب تدمير=ليته يجي لي ملك والا عطيه
من خاطر منساح مافيه تكدير=ومنتك يا راعي الهديه عليه