قال الذي في القول ما تاه مجراه=ينقد حسابه بالوفا والعدال
ببيات شعر كل ابوها منقاه=منسوبة ما دير فيها مجال
تسعف بها لي ذكر اليوم ما جاه=هم من الدنيا وفراق غالي
يشكي فراق اللي تجازت مطاياه=خل قريب وابعدته الليالي
الوقت لو يجمع يفرق رعاياه=ودنياك لو زانت سواة الظلال
حن فوقها والله عن السو يكفاه=تسقيك كاس المر عقب الزلال
يا بو علي حالك بالارواح نفداه=ونمشي على كيفك بحال وحلال
لي تطلبه لو بالملايين نشراه=أيضا ولي قلنا يتم المقال
ما هو ذب في رزم العلا بيح اقصاه=ودار الفكر في مقفيات الليالي
يطري عليه سعودهن والمصافاه=مع صاحب ما لاذ دونه بغالي
رعبوب مسلوب على الجاش رجواه=والله كساه بزين دل وجمال
سقم لطارد الهوى داه ودواه=والعشق في الدنيا من أول وتالي
ناره لهبها كل منعور يصلاه=وكم جادل منه بكت فقد غالي
قلته وانا زابن على الله بحماه=ذخري وانا مقبل عليه اتكالي
كم واهج بين السراجيف واكناه=واثني الشكر للي ينشي الخيال
يامل عين ينتثر دمعها وماه=تبكي على فرقا خليل طرا لي
تبكي بكا اللي دون حيه ومرباه=سود البحور وبر حيفا ولالي
تبكي بدمع هل من الموق مجراه=على وليف ذا مكانه وخالي
داره عفاها ريف النود واعفاه=وشارة منزل ضوهم والدلال
ضو عليها غالي البن يعباه=للضيف لي جت به دقاق الرحال
يا حي من هو يسكن الدار حياه=قفى ومن دونه سرابه نزال
تالي العهد به يوم قفت مطاياه=يتلون شف مزليات الامثال
يعل الحيا يسقي مقيظه ومشتاه=نو جعل سحبه كبار الهيال
وصلوا على اللي دبر الحق بهداه=نبينا اللي شال كتب ورسال
اعداد برق في دجى الليل شفناه=واعداد ما هبت هبوب الشمال