هلا بالجواب اللي لفتني مثايله=عدد ماصفق موج على حد سيف
واعداد نجم بان في ليلة الدجى=واعداد ما ثلب هبوب مريف
واعداد ما قد خلق ناس وارحلوا=بلاهم زمان فات وانكف نكيف
بخط لفاني منك يا طيب النبا=وشكوى من الحادث وفرقا الوليف
على وليف شد واقفت ظعونه=والقرم معهم غاديات شطونه
على الذي مزيون ماله وصيف

قفى مع بدو وكنهم مداره=ويشد في القافر بجملة عشاره
يا حيهم عزي لمن قر سيف

حي البديوي لي بدار عذبه=إلي تحت حوضه يجص طويه
ويشد لي من قالوا سهيل شيف

يا بو علي سود الليالي دهنا=ياما مضى في نحورهن واذ بحنا
في البدع ما تسمع جواب الخليف

وين الجوازي والنعام المذكر=اللي عليه الغيث في الحل بكر
ما يقنصونه غير غزو ونكيف

وان سلتني من ذا الزمان المصيبه=اللي دعا طفل المهدفيه شيبه
والزين لابده يعود كسيف

ما ظنتي في الخلق عد به مروه=وتناقصوا في السمت وين المخوة
يعيش من يدي جناب نظيف

يعيش من يدي فرايض صلاته=يصوم والواجب يبلغ زكاته
الدين لله والمقام الشريف

يا بو علي ما عنك عندي ذخيره=بالمال وقبال لوجوه السفيره
في اللي دعاك بكون جرح عنيف

أبيض عفر لي كن طيحة نهوده=عساه يقسم لك وحظك يقوده
قود الرسن في داريات العسيف

يا ونتي يوم الخلايق نيام=من بارها خاطر تكسر عظامي
من عبرة بالجوف قامت نزيف

أجر ونات على راس نايف=كني من فراق المحبين خايف
واغضي بعين هل ماها ذريف

من شافني شك أن قلبي دلوه=وهو لطراد الصبايا كموه
ويهزف من بين الضماير هزيف

لا باس لي شفت الردي من رفيقك=خله وتلقى في الجماعة صديقك
ناس تبادرك بجناب نظيف

خلك مع العليا ودرب الجمايل=واترك طريق اللي من الحق مايل
لي باع جنده واشترى له حفيف

تمت وصلى الله على خير هادي=شفيع خلقه يوم تمسك ليادي
عدد ما صفق موج على حد سيف