يا الله يا اللي خط للعبد تذكار= وانزل تبارك وامره بالسجود
يا كاتب الحسنات يا مطفي النار=وانشيت من تحت النصايب رقود
يللي لبيته كل الاسلام زوار=يسعون في طاعات منشي الرعود
يللي خلق دنيا ومسلم وكفار=وليالي تقفي وهذي تعود
يا مدير صلفات الهبايب والابحار=يللي لمن خافه مسوي وعود
تبري لمن طرش تماثيل واذكار=وهجن زهت بمنقشات البدود
هلا بالذلول وحي من فوقها سار=تراحيب مني ما لكثرها عدود
يا مرحبا اعداد تسبيح لقطار=وتكبيرهم وركوعهم والسجود
يليي شكى جرح الهوى سر وجهار=وامسى سهير والخلايق رقود
العشق لو تسعف لياليه غدار=له فجعة منها تصوم الكبود
سلمه ودوراته شرا لعب لقمار=كسار جبار معين صدود
مره مع دربه سهول ومحدار=ومره مع دربه جبال وصعود
ومر على الأبهر يعرقي بمسمار=بين الضلوع وساطي في الجسود
لا باس يا زين المناعير ومجار=لي وضعوا من عوض الانظا شدود
عيد لها باهلا وترحيب ووقار=وكرامة من حيل واللا قعود
وين يصاغالهم على صالي النار=مازون ويقند بهيل وعود
قلته وقم يا طارشي طب واختار=حايل من العيرات فيها العضود
تنحي مع الريدا كما قوسة الطار=موجاف ماقد صوعت بالكود
إلا على حسب المواجيب والكار=لي من بدا شف لمن هم سنود
مصيونه مطعونه جت وخضار=ومن لطم فرسنها تطير الحجود
تنصا محمد زبن وافين لشبار=اللي شكا من حب ضافي الجعود
حن في لزومه ناخذ الحق والثار=لاجله ولا شي علينا يكود
والنا على كل الملازيم مقدار=بامر الذي فارض صيام وسجود
إن كان دون مريش العين حيار=جيناه بالشيمه وصفة جنود
يطلب على كيفه ومن المال يختار=وندي الجزا من دون ضافي الجعود
ونعطي محمد جادل زين واخيار=رعبوبة من البيض شفة عنود
تشدي على ريم المقافير مذوار=متعب قنانيصه ومنهم عفود
وعزيل يا قلب به الهجس دوار=وهموم ياتنه فراد وظمود
على الذي ما طول الحس للجار=ولا رفرفت بين الجماعه بعود
تغطي وكنها من سحا الوجه بخدار=ولا قال فيها كل من هو نقود
تمت وصلى الله على سيد الابرار=شفيعنا يوم البعث والنشود