مرحبا بالقاف لي جا من صريف = عد نجوم في سماهن مدبحات
وعد ما تسري برايق الخريف = وامطرت واسقت ديار ممحلات
وعد ما كبر حذا البيت الشريف = والتفاف جموعهم وقت الصلاة
وعد غزو راح وانوى بالنكيف = في الزمان الاولى والنايبات
مرحبا يا راعي الرقم الخفيف = ولي على سيته نشر قبل الصلاة
امعط صوته مسوى له وحيف = صوت عقب من سماهن هاويات
طالبنك يا كريم ويا لطيف= لي فطر زمزم بقدره من حصاة
يا مجدي يا موفق يالطيف = رف بحال اللي عيونه ساهرات
من زمان عذبه وقت شظيف = وان بغى يدله تصداه عبرات
يشتكي من حب لي ماله وصيف = كامل الاوصاف سيد السيدات
ريم قفر في طفاطيف الخريف = عاد واقفي والجوازي مقفيات
ادعج لبسه من الناعم رهيف = ذاك يقتل والجزا منه حسرات
وان نظر لك حل بك دمع نزيف = وعبرة بين الضلوع الخافيات
لك على حسب الطلب وانت عريف = ولا حياة الا معاها مشكلات
كان قلبك م الولع يهزف هزيف = في طلبك انحل كل المعضلات
وان غمر ولمك نمليه بخطيف = لين تحلق في الركوز الفايزات
وكم قايد سرية لول رديف = ما كسبها م الوجوه المشريات
ولا سرى في تهلكه والوقت هيف = والغتام يهب والدرب وهقات
وبت قلبه ساهر يرجف رجيف = إن خطا واللا عليه المخطيات
واستمع يا مفتي الشرع الحنيف = الليالي مقبلات ومقفيات
إن عطتك وجهها ترزف رزيف = والفرح فيها نشوره بينات
وان تقافت ضامت القلب الخفيف = خل درعك منها صوم وصلاة
لا سقى الله شانها يوم عنيف = تنثر الغارة علينا بغفلات
كادني حتى المشي عقب الصفيف = ومن نشد قلت المطايا مقيدات
من قطف من عشبها يوم القطيف = بدلت له لو توثق بهقوات
قد وازني م الهوى حسرة وكيف = والسفر خلف ليال مظلمات
وكل غصن في شجر لازم يصيف = والقمر له طلعة عقب اطلعات
ومن تولع بالهوى ذب المنيف = فر قبل يزر ثوبه والعصاة
ونتي يا بوسعيد إلها زفيف = لي ذكرت اللي مضى والمقفيات
والصلاة أزكى على من هو شريف = النبي لي فرض صوم وصلاة