حيهم ليت الليالي تولفنا جميع = ليت من جال ذا العد ما شدوا نجوع
شرقوا القلب الامحق حزين مستليع = كنه يحمس بالمحاميس والعالم هجوع
يا الله انا طالبك يا سامع العبد المطيع = يعل جود السيل يسقي مفاليهم اسبوع
شافني شبحة عيونه ورا الهدم الرفيع = عود موز تاه بالزين من بين الفروع
إن بغيت انساه كني على جمر صريع = وإن بغيت اجيه عنده مواشيه سموع
ليت والي الامر والشور لي كل يطيع =وان عطاني صاحب المال ما جاله رجوع
غير انا مهتال من دانة في يد شفيع = هيرها تسعين في منكب موجه ضلوع
ما يوسوس في عطاها وعيا ما يبيع = دانة صافي حجرها ومالكها طموع
لية في الصدر لية مغاليل نتيع = لدها السراح وهي على ساقة نجوع
لدها حرص عليها وخايف لا تضيع = قد رعت في قونس الرمل وتدل الهزوع
لاعها المصياف من عقب مشتى فى ربيع =وفي تلايا الوقت راحت شناذيب مزوع
ذود من وصى عليها وبلغها الوديع = والتجا في البلد شغال والا له سنوع
عقبهم يالربع مليت من الخد الوسيع = ومن ونين الليل ذهبت في صدري ملوع
ما يقرب دارهم كون لي يلمع لميع = سبعة واثنين في العطس بالثالث طلوع