يا لوف قلبي لوف عشب لواه الصيف= نبات الجبل لي ذوبه بارح الكنه
تلوت غصونه عقب ما هو يعجب الكيف = تمايز سفيره والأهبه يلوفنه
صفاره بدا من عقب ما هو خضر ورهيف = تنكس وطرعات المثاني يعدفنه
على الصاحب اللي حال من دونه الحليف = ودناياه لي ما عزموا بالفكك منه
ألا يا الفرنكح قام دمع العيون يزيف = على الخد ما عاد النواظر يظمنه
يا بوحمد صاب الحشا واحد ما شيف = مع اهل المحافل والمجاهز يعكسنه
حسين الشباب اللي قتلنى بحد السيف = سنينه ثمان وعشر فيما بلغ سنه
معاريف بدو عند ذيدانهم طنيف = وبيوت الشعر لي هاشل الضيف يدعنه
انا كل ما شجيت زاد الحشا تكليف = نويت المراح وعاد في خاطري هنه
سقى الله مكان لمنا في قدوم الصيف = مع طيبين الجنس والنفس مطمنه
نوى بالفراق وشد من شورهم تحريف = على الهامشات ونية ما يسرنه
تعرض محول لاف منها النظر تلويف =ومطاياه من قل الشجر صوتها حنه
عسى الله يثيب الحال بالجود والتخفيف = على ما تهيا والمقاسيم يابنه
عسى لايم في شور لي مالهم تصريف = يبيع الغلا بالرخص والجيش يوطنه
وجودى على لاماك يا كامل التوصيف = وترى جيكم فرض مبدى على السنه
تجيبك يلي سجيت صوبي حلوم الطيف= تودي عبور الصدر لو كون مكتنه