يا الله يا منشى هماليل وقنوف=علا عفار القاع واخضر عودها
ويا من له التوحيد والشكر والثنا=له الطول من خلق تكاثر حمودها
ويللي بقدره عز الاسلام وانتصر=على دولة الكفار واخذل يهودها
تهيي وليف دونه اليوم حايل=لحاليح بعد وبعدها من حسودها
بغيت العزا من دون جيه ولا حصل=وتحدرت مثل الظما في ورودها
وليف عليه القلب هافت غصونه=عست مثل زرع جف منها ثمودها
عسى رايح الوسمي لي ناض بارقه=على دارهم ينهل مرهف رعودها
قنيف تلايا الليل تسري هميمته=حقوق المطر حتياه ترق رقودها
يلي شب عشبه ياه عل يزيف به=يحنزب بحمراها ويقشع بسودها
لفى منه الطارس وشدد جماعته=مهاميل عرب ما يدني قعودها
وغشوه الجماعه عقب فراق ما مضى=مقرين والنيات واحد شرودها
ومن عقب ذا يا راكب فوق حايل=عليهم الشحم والزود غاشي لهودها
رباعية ما خودوها غشامى=تهضع لمقاودها ورسن لي يقودها
عليها مراسيل لغانم تحيه=وعظيم الشكيه خابرينه سنودها
أنا يا بوراشد في هواي تنقضت=من الجادل اللي ضافيات جعودها
ضربني برمح دمها حار ما مشى = على ثومة السرجوف ورد حدودها
فلا ظن منجي بي صواب السلامه=برمح تحت لنجاف شارت عمودها
يهضع المسير وكن عوده يلي مشى=كما عود مشموم بخطريه نودها
عليه لعيون تهل صبح مع مسا=دموع على لسلاب يوقف حشودها
غفا دونه الغافي بهوي ولا صفا=وعلى الله تدبير الأمر يا جنودها
ولي العباد وخالق اللوح والقلم=قبل كل شي وخالق ريف نودها
ويا عالم بالذر في ليلة الدجى=نشا الخلق حكمه من عدم لي وجودها
تهيي وليف تل قلبي ومله=على الضو لي تدهر سعاير وقودها
لفا صوب ديرانه نسيم من الهوا=يهيض هوى نفسي وباحت سدودها
وعيني لشراف المبادي طليعه=على راس كل مشمر من نفودها
ورجلي للممشى صوبهم تنتحي بي=على جيهم وهدب البريسم يقودها
وزاد العنا بي جي ديران لابه=سنين مضت هيهات ماشي يعودها
قروم على الديران هذي ضويهم=وهذي منازلهم وهذي عدودها
تنقتهم الدنيا على الحق وارحلوا=ودثر فوقهم صخر السقايف حيودها
وعلى ذا الجبا ما كن قد مر خاطف=ولا قطنة وقت الصفاري شدودها
ولا كن في جاله غدا صوت مايح=على مترهفات الحمر واشباب سودها
وصوت المدوه لحباض مشتهر=وغرب يلي ميزت يعيل ردودها
وصوت المنادي لي ضوا الليل للحلب=يلزم على الواعي يوقظ رقودها
وذا الحين صارت به سكيك جديده=مع عسكر كل يوم ميجر يرودها
تمت وصلى الله على سيد الملا =عدد ما صفق في عالي الطعس نودها