عسى الله يزين فالهم وين بيقودون=جدا الهدب واللا في الديار الشماليه
فراقين بدو قادهم رايح مضمون=خضاره وعشبه ما تولد متاليه
عليهم قفول الصدر تقرع قريع شنون=سببها على خل دياره خلاويه
أنا سال عنهم ربهم ربعوا من دون=ولا زلفيوهم رايدين الفروثيه
عسى الله يسقي دارهم ربهم يثنون=حقوق ثلاث شهور تاخذ رواسيه
جنوب وشمال وشرق وتحده أم قرون=على السيح والرمله تفيض خباريه
هني الخوالي لي براحاتهم يمسون=ولا همهم لي يبعد الحي عن حيه
وانا لو بغيت الصبر ما اتحمله وشلون=وصواب سطا لي من العنود الخفاريه
تقود السحا ويقودها والبقايا ركون=كما عود موز شايخ في مساقيه
تدور الليالي دورة حبها مطحون=بدت وانتهت حسناتها بدلت سيه
ويابن عويضة ليت عن خاطري يدرون=تكدر وجوه ما تصفا مهاويه
انا طالب اللي رحمته بين كاف ونون=رقيب على عبده ويعلم طواريه
مدير الهبايب لي سجد له جميع الكون=ومن صلب أدم بث عالم وذريه
تقرب ديار اللي لهم خاطري مشحون=تجيبه حلوم الليل واشفق بطاريه
انا اطرب شدود البدو للقفر ويحلون=وصوت المدوه يوم ينوي على الضيه
تغير علينا الوقت ومداولات السون=وعاداتنا اللي كنها اليوم نكريه
يلولا الوظايف والملازيم والقانون=نويت السفر بالكل واللا بشخصيه
لك الحمد يلي بقدرتك كل شي مازون=ويا مجعل الخضرا وهذي سناويه
ويللي عطاياه الجزيله بغير منون=مدير الفلك في الكون تجري سواريه
على ما تشا وتريد في الكاينات يكون=وعبدك مسير وين تمشي خطاويه
وصلاتي وتسليمي على الهادي المامون=شفيع امته يوم البعث والمحشريه