بدر تجلى في سما دوحة الخير=بين الكواكب والنجوم المنيره
رجل الوفا نسل الرجال المشاهير=لطامة العايل بحد الشطيره
متسلسل من روس قوم مساطير=أهل المكارم والوفا والمجيره
فرخ الحرار النادرات الحواشير=حر تحدر من صقور الجزيره
حاز الثقه من والده سنه صغير=وله هيبة من بين ربعه كبيره
مواهب الرحمن حلم وتدبير=والعدل تبصر به عيون بصيره
مبروك لك من صادق الحس يا امير=ويالله عسى سعود الليالي سفيره
واجمل تهانينا بفخر وتقدير =احساس شاعر لك ضمرها ضميره
أخن وانوج من عطور الغنادير=ومن ريح ريحان بنشوة عبيره
والذ واحلى من حليب المصاغير=ترعى زماليق الرياض النضيره
وعسى انها لك يا سنادي مسافير=واجمل تهانينا بصدق البريره
واختامها مني صلاتي بتكبير=على نبي الله رسوله نذيره