عفا الله عن نفس كثيره همومها=وعين سهيره ما تهنت بنومها
وكبد تقزت عن غداها وشربها =عليله وعل الله حي يلومها
يلي غضت الدلهين بالنوم وامرحت=دعتني هواجيسي وسنت هجومها
ألاحي حمام الورق لي جر بالغنا=على نايف العيدان واعلى رجومها
واخفي عن الواشين بالجوف عبرتي=ولا بيح الاسرار صدري كتومها
واصاحب هل الجودات والطيب والسخا=وأبعد عن اللي عشرته ما يدومها
ونفسي عزيزه عزها راس مالها=يعز الفتى نفسه إلى حتف يومها
هوى البال والغايه وشفي ومقصدي=مخوة رجال طيبات سلومها
خوال وبني عم يلي من نخيتهم=لهم وقفة ما كل حي يرومها
ولا النفس تطرب دون شف ومطلب=مطاليبها سوق القدم في حزومها
ديار سقاها الله من زود رحمه=عليها هميل الغيث مبطي غيومها
مرب اليوازي لي رتوع بربعها =هبوب الواري ما تعفي رسومها
وعلى الكف خطوات اشقر باهي النحر=تحلى بياض الريش دقة رقومها
تهازع له المنكف بمثناة عاتقه=وله الساق جبر ومخلبه به سمومها
محد النظر كن البصر صافي الحجر=يلي تل سبقه صيدته وقف حومها
يحول لها بالقاع لي من تكبرت=ولي علقت بالجو يضعف عزومها
يعرقي لها ويردها في مهدها=يغذيه صقاره مغالظ لحومها
فهذا هو المطلوب والشف لي حصل=يجلي عن النفس الحزينه همومها