اليوم سبق موشرات الجلاليف=اللي على الهيرات تطرح الاسنه
ما بين لجات البحر والعواصيف=يا كم قوع بالعوادي نصنه
وغاصوا بهيرات طوال المهاييف=والسيب طيات اليدا قطعنه
ايام حمرا القيظ في لاهب الصيف=يوم النجوم الساريه مستكنه
ما بين سكر ووكر واقواع بالشيف=ومن يعتصم بالله ما خاب ظنه
وكم عرضوا واثنوا عليها المجاديف=والنوخذا ينهم عليهم بونه
وتراثنا حافل بعز وتشريف =ولو تغيرت الايام ما غيرنه
يا جاهل الماضي ولا يفهمه كيف=تعال نشرح لك اصوله وفنه
ايام سفن الغوص تبحر من السيف=ما حط وسط صدورهن ينقلنه
هذا الصحيح مورخ دون تحريف=عهد سلف لاجدادنا عاصرنه
واليوم من فضل الشيوخ العواريف=أعادوا لهن تاريخهن لي قضنه
اقيم احتفال ما نرى له تواصيف=في كل عام صار عاده وسنه
تحت رعاية شيخنا زبن المخيف=ريف الضعيف اللي ظروفه حدنه
زايد وهو زايد بحكمه وتصريف=مثله حشا الخفرات ما ينجبنه