تباركت يا رحمن يا الواحد القيوم=مدير الفلك والكون يا عالي الشاني
اسالك العفو ورضاك يا منجد المظلوم=واسالك الهدى بالله على الحق تهداني
دعتني دواعي الشوق في حفل هذا اليوم=وتخيرت في نظم القوافي لوزاني
تماثيل مدلول يحاتي الخطا واللوم=بداري على الكلمه من الهذر والشاني
وتحيه بهذا اليوم تهدى عقيد القوم =عزيز النسب عالي الرتب بن نهياني
هلا يا موحد في قيادتك سبع نجوم=ضفاف الخليج اشرق بها وانته الباني
آمارات يا شعب الامارات عش مكروم=تحت راية اللي رايته فضل واحساني
بذل جهده الواسع وبجد وعداه اللوم=جمع شملنا صرنا قرابات واخواني
جمعنا بوحدتنا عطى الحق للمظلوم=قضى الحق لاهل الحق للعدل ميزاني
بوحدة خليج عهدها مستمد ودوم=من الساحل الغربي الى واحة عماني
ومجلس تعاون حقق لمجتمعنا حلوم=صفا الود بين الشعب والحق برهاني
تحت راية الاسلام والواقع المحترم=على دين واحد ما لنا عدة أدياني
نصلي لوجه الله نصون العهد ونصوم=بدين الحنيف ومن فرض خمس لركاني
حمانا حمى واحد لنا عادة وسلوم=نرحب ونكرم من لفى دارنا عاني
بوجود من يذري به الخايف المضيوم=حليف المكارم حازها جهر واعلاني
زعيم السياسه والفراسه لها قيدوم=يجدد تراث اجدادنا عبر لزماني
زمان تقضى له مع الغانمين رسوم=شغاميم قوم تعتلى سرج ربداني
وحمر أصايل دشنهن دسملي رقوم=صنايع بنات البدو خدرات لاعياني
يبوين سراب الخد لي روحن زمزوم=ولي من تواطن ساحة الريس غزلاني
ولي قبلن صوب المنصه تقول ريوم=يذيع المذيع بناقة فلان وفلاني
سلالة لاصايل ما اخلطتها علينا وسوم=أبوها ولد صوغان والخال ظبياني
واهني هل الهجن النجايب بحفل اليوم=تهاني وفا واخلاص من قلب ولساني