يقول الذي الاشعار غايص بحورها=هيارات عمق غاليات درورها
تخيرت في عد القوافي جزيلها=حسين المعاني مزملي ما يبورها
ولا اعدها يا كود في واجب لها =ولي حل واجبها رسمنا سطورها
وها انا بحفل اليوم ثارت مشاعري=بيوم احتفال فيه رفت نشورها
نشور الفرح بقدومكم ياهل الفرح=وبحضور من يكمل فرحنا حضورها
بحضرة زعيم منزله ذروة العلا=رقى في هضاب المجد واعلى وكورها
وهو شيخنا زايد ذرانا وذخرنا=حفيد الأكابر لي طوال شبورها
وهلا مرحبا حييت يا صاحب الوفا=ويا صاحب الدار العزيزه وسورها
وهلا بالضيوف اللي على الدار شرفوا=ديار الكرام اللي تحمل مخسورها
بضيوف بو سلطان أهلا ومرحبا=وحي الركايب لي تعلوا ظهورها
عنيتم على عنس النظا جبرة العضا=خمص البطون اللي وساع نحورها
دعيتم واجبتم دعوة الشيخ زايد=عسى دعوته في كل عام بدورها
هلا مرحبا بحضوركم في دياركم=بكم يغمر النفس الأبيه سرورها
هلا بالوفود الزايره والف مرحبا=اعداد ما تشدو بلابل طيورها
واعداد ما هلت على القاع وامطرت=قنوف تزاغيها نسايم بكورها
تراحيبنا تثنى لكم في قدوكم=شذا الورد والريحان نفحة عطورها
والمشاركه بافراحنا غاية المنى=ترابط علاقات عميقه جذورها
وتوحيد رايتنا على الخير والهدى=على سنة غرا ضيا الصبح نورها
وهذا ونحن اليوم في غاية الفرح=نشاهد من الهجن النجايب نفورها
على ساحة الميدان عند احتضارهن=تقافن كما سرح الظبا في نشورها
عراميس حيل ما تحايل بها الفحل=ولا قد لجت حيرانها في حجورها
تساعد غواريهن تهازع فقارهن=نفي المرافق عن ملاميس زورها
ينادي بهن امذيع لي منه قبلن=على ساحة الميدان تهتف حضورها