يالله يالمطلوب يا عالم الغيب=يا واحد منك الهدى والرشادي
فرد صمد مافيك شك ولا ريب=بك تهتدي القلوب يا خير هادي
يالله نجدينا على الحق لمصيب=فيك الرجا يا من عليك اعتمادي
يقول من خط المثايل بترتيب=محكومة الاوزان حسب اعتقادي
خط القلم بالطرس قاف بتعريب=مثايل ما قيل فيها انتقادي
تهدى الى نبع السخا منقع الطيب=اللي على العليا بروحه يفادي
ساس الرجال أهل السيوف المخاضيب=فرز الوغى ضد الخصيم المعادي
وسور البلد عن عاصفات اللواهيب=غيث سقى الاوطان بالخير جادي
حقق لنا كل الهدف والمطاليب=وواكب براية عزنا باجتهادي
وبمناسبة ذا اليوم للفطر الشيب=يوم نعده من ليالي العيادي
فيه اجتماع اخواننا والاصاحيب=لي في القلوب إلهم نكن الودادي
واللي لهم نثني جزيل التراحيب=نيابة عن حضرها والبوادي
انتم ضيوف الدار واحنا المعازيب=يوم استضافتكم حكومة بلادي
وبلادكم ما انتم عليها باجانيب=يا مرحبا جي القروم العوادي
اللي تعنوا فوق عوج المصاليب=شيب الغوارب عابرات الريادي
وفي ساحة الميدان شفنا التعاجيب=الواقع الحاضر عن الفعل زادي
هجن تلوب الخد لوب السراحيب=ما كنها الا طايرات المعادي
حاولت اجيد وصوفهن عسر وتعيب=مثل الريوم الذايره في الحمادي