قال الذي في بدع الامثال حريف=مثايل محكومة الوزن والقاف
ادرى قوافيها عن النقد والزيف=أخاف من كلمة نقود له اشفاف
واحب أقول الصدق ما اقول تطفيف=والحق تشهد به من الناس عراف
واغوص لجات البحور المهاييف=وانقى من الجوهر غريبات الاصناف
واجيبها واصيغها دون تكليف=وتطيعني وتجي على الامر ميلاف
وارمي الهدف لي من خطا كل هديف=وشتان فرق الناس كل له اهداف
وانا هدف قافي ترى مثل ما شيف=في ساحة الميدان بالعين ينشاف
يوم اركضن علط الرقاب المعاسيف=وذاع المذيع وصفق الحفل باكفاف
وتصدرتهن في الاوايل هفاهيف=تستاهل الناموس يا نسل الاشراف
يا نسل شيخ مكرم الجاروالضيف=وزبن الدخيل ومن لجا فيه ما خاف
فوز الذلايل رغبة النفس والكيف=يعل البخت والحظ يا شيخ مسعاف
فج النحور وكالاهله معاطيف=شيب الغوارب م التمطاي نحاف
مثل الأدامي يا عجيب التواصيف=لي ذارهن من قافر الخد لقاف
وسفن الصحاري ناقلات المراديف=لي روحن في سحب البيد زفزاف
من فوقهن نقالة الترس والسيف=صفوة قروم مرويه حد الارهاف
تاريخنا الماضي تراث الاساليف=ونعتز في تجديد تاريخ الاسلاف
والفضل لله والشيوخ العواريف=أحيوا تراث اجدادنا مضى وطاف
وافضالهم عمت وساع الاطاريف=نو سرى برقه من الغرب رفاف
راكد سحابه لا رعد لا عواصيف=اسقى الأراض وعمها رمل واسياف
وصلوا على الهادي صلاة بتشريف=أعداد ما طافوا على البيت طواف