يا سعيد قم ثيب بعجل=والحق عليه يا زميل
عجل وترك كل عمل=يا سعيد انا عندك دخيل
خلي تبلوه الأهل=هم لي سعوا بقول وقيل
حسبي عليهم من أهل=الله يجازيهم وكيل
يا اللي خذوني بالذهل=ما ادري أنا عابر سبيل
ما كان ذا فيهم الامل=حرام نكران الجميل
وأنا على الله متكل=والدهر في جريه مطيل
لعل يصفى لي لعل=دهري ولو صبري طويل
يوم اذكره دمعي هطل=جريه شرى وصف الصميل
لا هوب في يوفي اشتعل=جرح فوادي العليل
لنه وداده كد نزل=في القلب من وقت طويل
حاشا ولا أرضى بدل=عنه ولا أبغي بديل
ما كد تنكر أو زعل=نعم الخوي نعم الخليل
لطفه ملكني به خجل=حاشاه عن حبي يميل
عوده تربى في غتل=متغريف خده أسيل
بدر تعلى واكتمل=در الحلا طرفه كحيل