أبات أنعي سالفات الليالي=نعي اليتيم اللي اغدرت به النوايب
بصفق على اليمنى بكف شمالي=وتذري على وجهه ذواري الترايب
نام الخلي ياللي من الهم خالي=وابات أنا في لج بحر المصايب
موج كدر طامي عليه وعالي=يدلي في قلبي مثل دلي الطلايب
وين الذي لول عليه ايسالي=وينه سخي النفس عالي الجنايب
وين الذي عين القطر فيه سالي=في شفة حمرا عذوب الرضايب
وين الذي أهواه أول وتالي=وينه عديل الروح أغلى الحبايب
بيني وبينه ضاق رحب المجالي=دونه كلام الواش سوى حجايب
بو عود غرياف هزوف ومالي =ميال غصونه نعيمه لبايب
يمشي ملك يختال ماله مثالي=وخدود له تشبه شموس المغايب
دونه الوصف يعجز ويعجز مقالي=كل شي منه للنواظر عجايب
زوله تحكم بالرضى في خيالي=واشم عطره لي ضوت به الهبايب
من فرقته مروان منحول حالي=والدمع من قاع المحاجر سكايب
مشلول فكري منشغل فيه بالي=حسبي على من كان منه السبايب
لولا التعلل بالليالي الخوالي=ماكنت أصور بالقوافي الندايب