كم قلت لي اتهيد لي وريض=يا معذب قلوب المجاريح
وقلت الوعد لي عقب لمقيض=خله عقب طي المساطيح
راح المقيض وقارب امقيض=وابدت على وجهي التباريح
يا ليت صبري ينال تعويض=عقب الشقا أهنا بتفريح
يا سيد السمرات والبيض=يا قايد أريام المساريح
يا بو عويد يشبه الغيض=نورك يحد ضي المصابيح
محلى يدايلك المناقيض=لي تنتشل مع نسمة الريح
واعيان سودا نعس أيفيض=منها السحر ولموتي اتبيح
سلمت لك أمري بتفويض=لو كان تبغي دمي ابسيح
في الناس ماحد عنك يعيض=أرضى بعذابي دامك امريح
لا تلوم قلب أزم يهيض=مجروح ومشرح تشريح
أصيح ودموعي لظى اتفيض=شروى اليتيم الياهل ايصيح
بوصلك لو ظهري انثنى ابغيض=على ظهر بنت المساريح
حمرا رباعيه ولا تريض=ما فوقها غير المناسيح