أتشيمك بالله يا زين شيمه =واستحلفك بالله يا نور لاعيان
يا راعي النفس العزيزه الكريمه =اعطف على مضنى معذب وهيمان
شوفك معي الفرحه واغلي غنيمه =ووصلك عليه العيد وافراح لزمان
وهجرك يخليني فحاله سقيمه =شروات زرع فاته الدور عطشان
إرحم وخل النفس عندك رحيمه = يرحمك ربك خالق الكون سبحان
ما يحق لي منك الزعل والظليمه =وأنت على لفواد حاكم وسلطان
وين العداله والمعاني الحشيمه =لا خوف لا رحمه ورأفه وتحنان
صيف العمر يا صاح هايف قضيمه =يبغي سقى من ثغر زاكي وفتان
يا نور القمر لي بان من بعد غيمه =يا طلعة الشمس المنيره ع لاوطان
إسمك ايريح القلب يحيي هشيمه =يستفحل المنطوق غالي فى لاثمان
ليتك تجود ابجود لفته كريمه =ولجواد تزرع يا الضنا طيب واحسان
ليت القلب يهنا ويلقى نعيمه=يكتب على متن السما عنك ديوان
اتشيمك مره أخيره ابشيمه =لا يستوى قلبك حديد وصوان