يا بنت حارتنا علام القطاعه=علام تنحاشين عني وتقفين
كني غريب الدار ما عدت منها=قولي الحقيقه ليش عني تخبين
ما تذكرين أيام كنا حبايب=نبني صروح الحب والناس ذهلين
فيها تعاهدنا على الحب والوفا=مهما الظروف تكون بنظل وافين
لو عاندونا الاهل بالوعد نوفي=ونقدم الارواح لجله قرابين
أيام كانت ع الخواطر مريحه=للحب بالوجدان كنا ملبين
واليوم ما عدنا كما كنا الاول=للحب والعشره الطويله تنكرين
كأن ما كنا في حاره ربينا=انت وراء الهادي وانا خلف قزوين
أبكي على زرع زرعته وسقيته=من نبع قلبي من حنايا المحبين
واليوم قلبي ما تهنا براحه=حتى ولا أغنم نظره من العين
ما حيدني يابنت سويت زله=وانت أخص الناس بالحال تدرين
انت نظر عيني وعمري وحياتي=وانت النسم والدم وسط الشرايين
حرام اتعذب واقاسي عذابي=والغير يضحك يا حبيبه وسالين
لو يسمع الجلمود زقرة حنيني=من زود ما بي غصب يا بنت بيلين
أسهر ليالي والليالي طويله=واحسب ثواني العمر أيام وسنين
ما كان في الحسبان هذا تجني=وما كان في الحسبان يا بنت تجفين
ليواد توفي في الهوى والمحبه=وانت عليه اليوم بالعطف تمنين
انت الحبيبه الاوله والاخيره=للقلب لو ع القلب يا بنت تقسين