موضوع نقاش هام ( الخلط في كليات التقنيه)

الســلام عليكم حباايبي شحالكم وشوعلومكم


الصرااحه انا عندي قضييه ودي اني اناقشها ويااكم وهيه الخلط الي استوى احيين في كليات التقنيه مبين الأولاد والبنات

فمثلا في كليه دبي للطالبات حطولهم شباب احين يدرسوون ويااهم كيييف يتسوي جي او كيف النااس يرضوون مايستوي اصلا اظن انه عاداتنا وتقاليدنا تفرض علينا شي ثاااني وانا اشوف انه الأنكليز يبون يخربون عيالنا...

وفي كليه دبي للطلاب ( انا ادرس فيها ) الصراحه يعني اغلب الشباب مستغربين كيف ايبولنا بناات في الكليه كيف يحطون مجموعه بناات يدرسون في كليه شباااب مااايستوي
لكن شو نقووول نحن عااد
واتمنى انه كل واحد من كم يعطيني راايه

السلام عليك .. اخوي بن حموده ..

فعلاً الكلية صارت خلط .. وهذا الشيء غلط .. يعني انا لما شفت كنادير بيض عندنا في الكلية بققت عيوني .. وقلت خلني اتأكد .. يمكن انا غلطانه ودخلت كلية ثانية .. بــس طلعت هااي كليتنا ..

بصراحة الموضوع كله غلط .. يعني بناتنا ما ينزادن عشان يسوون هالشيء . طبعاً البعض مش كلهم . .

يعني لو تشوف اللي يصير بالكلية . عجب عجاااااااااااااااااااااب .. ولا بعد ازيدك من الشعر بيت .. اللحين قاعدين يسوون بلوك يديد عشان يزيدون عدد الطلاب في الكلية .. ولا من السنة اليايه بيخلونها سايبه .. يعني خلط خلط .. وبصراحة حرام عليهم .. لأن كثير من العوايل ماراح ترضى بهذا الشيء .. وبالتالي ممكن انهم يوقفون بناتهم عن الدراسة .. وهذا فيه ظلم للطالبات .. فيا ريت لو يعيدون النظر في هذا الموضوع ..

لأننا مش قادرين ناخذ راحتنا بالكلية .. لا اذا طلعنا نتمشى .. شفناهم في ويهنا واذا رحنا الكافتيريا لقيناهم في ويهنا واذا رحنا المكتبة والملتقى بعد قدامنا .. يعني ما يصير هذي اسمها كلية التقنية للطالبـــــــات .. وهم خلطوا الحابل بالنابل .. بدون تفكير ولا دراسة ..

لكن سالفة ان في طالبات يدرسون في كلية الاولد هذي يديده اول مره اسمع بها ... الله يعينا بس .,. والله يرد لهم العقل ويصححون قرارهم قبل لا يصير شيء يندمون عليه ... ويقولون يا ريت .. لأن الصراحة المناظر اللي اشوفها كل يوم ما تسر .. خلوها مستورة بس ...


والسموحة

بسم الله الرحمن الرحيم
السلام عليكم ورحمة الله وبركاته


ابصراحه هالأمر يكدر الواحد،،، وأنا انصدمت مثل الباقين،، صح انا مخلصه من الكليه والحين يالسه أكمل دراستي ولكن فرق بين قبل والحين !!

من بداية الكورس وانا ملاحظه هالأمور وحركات البنات مع الشباب !!!
مره شفت وحده موقفه عند سيارتها الساعه 8 في الليل ويا واحد هو واقف مجابلنها ونقاش امبينهم !!
بالله عليكم شو من النقاش يدور امبينهم في هالساعه ؟؟؟؟؟؟؟؟؟؟؟؟
بتقولولي شغل ؟؟ وبروجكت وخربطان !!؟؟ عنبوا الساعه 8 الناس اتروح هالوقت وهم موقفين في الباركات،، ولا عاد واقفين في الباركات اللي ورى موول ويسولفون ؟؟
والله كان شكله يعاتبها على شي والله تعالى العالم ؟؟
بس صدق اي واحد يشوفهم شو بيقول ؟؟ يعني منظرهم من الأصل غلط x غلط ,,
ويوم قلت حق السكيوريتي ليش ماتخلون واحد يحوط بسيكله في الباركات؟؟ وممنوع البنت تكلم الولد صح ولا لا ؟؟ جان يقولي صح بس اونه ماعندنا موظفين كفايه يحوطون في الباركات ومانقدر انسوي شي !!!!!!!!!!!!!!
غربلات ابليسهم يعني ماعندهم سيكيوريتي واحد يحوط هناك ومكثرهم اللي يحوطون داخل الكليه ايدورون اللي يرمسن في التيلفونات هههههه مصخره والله ,,


لا وبعد من يومين سايره الكليه عندي محاظره وتوني داشه البلوك إلا أشوفلي واحد فويهي، بس سويته هو واليييدار واحد وعصبت يعني موول ماشي خصوصيه،، ويبالنا ننصح الإداره انهم يشلون كلمة الطالبات من الواجهه ويكتبون بداله المختلطه ولا يقصون على خلق الله ويقولون انها للطالبات فقط !!!!!!

تعرفون يبالنا انرمس بوراشد ونخبره بالمصايب اللي تصير ,,


والسموحه بس صدق معصبه ,,

احترامي
شموخ الإمارات

اولا يعطيك العافية اخوي

ثانيا: الكل رايح الجامعة يدرس محد رايح يلعب يعني محد فظي حق حد

عشان جذي اظن انه مافيها شي لو تكون الجامعة خلط

لأن الزين زين حتى لو يدرس في مكس كولج

اولا واخرا الدور على الاهل ومسؤليتهم في التربية والتأسيس

صح ولا لا؟؟؟؟؟؟؟؟

حبوبه هذا شي أكيد ولكن مانغفل عن انه للشيطان مداخل كثيره !!
ويوم انه الكليه توفر السبب اللي يخلي البنات يتجرأن ويكلمن شباب وهو عادي ويشجعون عليه المدرسين فاسمحيلي بأني اعارض هذا الأمر ,,
الإختلاط مايانا إلا من الغرب !!
ونحن لنا عادات وتقاليد تمنع البنت انها تسولف او تكلم إنسان غريب ,,
وعاد الطامه الكبرى ان خلوهم يسوون بروجكت جماعي، أكيد بياخذون ارقام بعض او ايميلات بعض وعاد حدث ولا حرج !!
لو بنقول انه البنت بترمس الولد باحترام وبحدود بس هل هالأمر بيرضي رب العالمين ؟؟؟؟؟؟؟
طبعاً لا والبنت مب مجبروه انها تتستمر في هالمهزله اللي صايره ولازم نوقفهم عند حدهم هالاجانب ,,




يرجى زيارة الرابط للأهمية:
http://63.175.194.25/index.php?ln=ar...QR=45883&dgn=4

الله يعينا عالزمن الياي
يمكن الاختلاط حتى في الثانويه
ومشكورين عالموضوع

سلام


اول شي انا ضد الاختلاط في الدراسه

بس عندي مداخلة للاخوات
اللي يؤيدون الاختلاط

اولا::: كل طالب غايته العلم
و محد فاضي لحد


من قال هالكلام؟؟؟..
نص الطلبه اللي في الجامعه
مب داشين للدراسه

اللي ياي عشان ما ينقاله فاشل
و اللي ما انقبل في اي مكان
غير الجامعه((لا حول ولا قوه))
واللي ياي ((حشر مع الناس عيد))

و وايد اسباب ثانيه

فما بالكم اذا يابولهم البنات لين عندهم؟؟؟
اسميها بتحلو السالفه لاه؟؟؟

ثانيا:::الزين زين حتى لو كان في مكس كولج

انزين مثل مافي زين ....في شين بعد
و نحن نخاف على الشين مب الزين
يعني الزين ما بيتأثر
و الشين بيستوي اشين
ـــــــــــــــــــــــــــــــــ

نحن عندنا في ( المعهد الاسلامي)
جامعة الامارات مالت الاولاد

الاختلاط صاير في كليه وحده
و هي كلية الit او تقنية المعلومات
بس انا بصراحه ما اسميه اختلاط
هو صحيح انه البنات و الشباب يدرسون
في مكان واحد لكن المبنى مقسوم الى نصفين
قسم للبنات و قسم للشباب
يعني حتى ما يشوفون بعض

بس شكلها العدوى بتنتقل
و بيصير كل مكان ((خلط بلط))

((الله يعينا ...و يصبرنا))


سلام

السالفه تطورت ... اليوم لما رحت الكافتيريا ... لقيت شلة شباب يالسين يتغدون معانا ؟؟؟؟؟؟؟!
قبل كان تواجدهم محصور في اماكن معينه ... بس اللحين .. عادي وعلى عينك يا تااجر ..

وبعدين بغيت اقولج اختي طفلة الحب .. ان هذا القرار ما كان قرار الاجانب ... كان قرار ناس اعلى منهم وللأسف انهم مش اجانب ..

واختي شموخ الامارات السالفه واصله لبو راشد من زمان .. وياما اتصلنا واشتكينا .. بس ماشي فاايده .!؟