سؤال يحيرني..هل ذكر اسم الزوجة او الشقيقة >>>عيب !!!

السلام عليكم ورحمة الله وبركاته


هذا الموضوع يتردد على بالي من فتره وحبيت انكم تشاركوني باراءكم ..



في ظاهره غريبه منتشره بشكل كبير وخاصه في مجتمعاتنا الخليجه ..

وهي ان الريال لازم مايذكر اسم اخته او بنته او زوجته سواء اذا عند احد
من ربعه او عيال عمه او ....الخ ويعتبر ذكر اساميهم عيب او منكر ..



وحتى في الجوال .. تلاقونه يحفظ اسم زوجته بــ أم العيال او الاهل خوف من ان احد يقرا اسماءهم وينحط الريال في موقف محرج..

وحتى مره وحده تسولف عن اخوها تقول انه يخلي ارقامهم بدون اسم

خوف ان احد من ربعه يقراهم .....


الي مستغربه منه ليش هالاعتقاد يسود عندنا ... مع ان الرسول صلى الله عليه وسلم ما كان يعتبره عيب .. وكان يذكر اسامي زوجاته وبناته رضي الله عنهن ... والحال مثله عند باقي الصحابه رضوان الله عليهم ..



اتمنى تشاركوني في الموضوع وتعطوني وجهات نظركم ..



اختكم
المياســـة

السلام عليج اختي المياسه..

هيه صدق و الله الاحظ انا بين الرياييل هالميزة انه ما يحب اسم حرمته او اخته ينذكر.. بس مادري شوه مشكلة اسامينا ..الظاهر الريايل يتفشلون ان ربعهم يعرفون اسامي حريمهم!!
اخوي حاطني SISTER في تلفونه !! مادري شوه السالفه؟
مع انه صدق ايام الرسول و الصحابه كانت اسامي الحريم عادي معروفه ..بس مادري شوه طرى ع شباب هالأيام..وبيني و بينج الزمن تغير يعني من قبل كانوا محترمين مب الحينه بس يبون الزلة عسب يطنزون ع بعض و ممكن اسم الحرمة او البنت يكون ماده حلوة لهم عسب يفشلون بعض و يطنزون ..
عموما ..الله يهديهم جميع..اشكرج فديتج على طرحج للسالفه و انشالله يردون الرياييل على هالسؤال عسب نعرف شوه البروبلم

السلام عليكم ورحمة الله وبركاته

سؤال حلو بالفعل اختي

ليش الريال مايطري اسم اخته او زوجته اوحد من هله " حريم " عند ربعه ولا هله الرياييل

تعرفين ليش اختي

لان مجتمعنا الخليجي عودنا على جي ..
هي يمكن عادة غلط بس فصالحنا

لان في ناس نفوسها ضعيفه يعني لو ربيع اخوي عرف اسمي بسير عند ربعه الباقي والله اخت فلان اسمه جي وبينتشر الاسم ويوصل للاخ واحتمال بعد ربيعه يزودها ويألف قصص من عنده اونه تعرفني وربيعتي ومن ها السوالف ...

يعني الاخ بيستوي في موقف حرج والاخت بعد يمكن تروح فيها والسبة شو اسمها

انا اخوي مب مسيف ارقامنا ابد لا حافظنها ومريح عمره

وللعلم مشاكلها اكثر من ايجابياتها

تقارنون ايام الرسول صلى الله عليه وسلم بايامنا
تقارنون الامان بالخوف

مقارنه غير منصفه

وها رايي

والاختلاف في الراي لايفسد للود قضيه

واذا سمحت لي الظروف ان شاء الله لي عودة

يزاج الله عنا كل خير

تمنياتي لج بالتوفيق

اختج القلب الحزين

السلام عليكم

أختي سؤال
شو بيكون شعورك لو سمعتِ إسمك ينطرى بين الشباب؟
جاوبي على سؤالي بعد تفكير وبتحصلين الرد على سؤالك

السلام عليكم أختي المياسة...

زمنا احنا تغير عن زمن الرسول صلى الله عليه وسلم..في زمن الرسول ما كان في شي اسمه اول ما نسمع اسم بنية نقوم و نحفظ اسمها و عقب نقول فلانة هذي اخت فلان او فلانة زوجة فلان..فلي يصير بالهزمن ان الازواج و الاخوان صارو يحطون اسامي حريمهم او خواتهم بألقاب و هذا الافضل...

تحياتي اسيرة الليل

لهفة قلب

هلا فيج اختي .. واشكرج عالمشاركه ..

ترى حتى انا اخوي مامسيف رقمي في جواله ومخليه بدون اسم
وصح انا اتفق معاج ان الزمن تغيير وماعدنا مثل قبل .. الحين الواحد يخاف من كل شي ويطلب من الله الستر .. و من وجهة نظري انه مو عيب ولا حرام ان الواحد يطري اسامي هله .. ادري ان هالطبع صعب تغييره وخاصة ان عاداتنا فرضت علينا هالشي ولكن هذا مايلزمنا ان نكون مقتنعين بكل شي تفرضه علينا العادات والتقاليد .. فللاسف في اشياء كثيره خاطئه ولكن بحكم انها من العادات لازم نلتزم بها ...

اشكرج الغاليه مره ثانيه عالمشاركه





القلب الحزين

هلا فيج عزيزتي اسعدتني مشاركتج ..
المهم انا اتفق معج بان الاختلاف لايفسد للود قضيه ...
وصح ان الزمن تغيير وماهو مثل ما كان قبل .. للاسف

ومثل ماقلت للاخت لهفة قلب .. انا من خلال طرحي للموضوع
ماحاولت الا اني ابين بعض العادات الخاطئه الي موجوده بينا والي فرضناها على انفسنا

وانتي قلتي اذا الاخ ذكر اسم احد من اهله قدام ربعه بتصير فضيحه ... انا اشوف ان الاخ لو بيجي وبيذكر اسم احد من اهله لازم يكون حذر ويعرف اهو يتكلم مع من .. يعني مابيذكر الاسم في مجلس مثلا او صديق مو اهل للثقه .. وثاني شي مابيكون ذكر الاسم الا اذا كان لضروره .. يعني مو مني والدرب يجي ينشر اسامي خواته ويشهر بهم ..

طيب خلينا من الاصدقاء .. بعض الشباب مايذكرون الاسامي حتى عند عيال عمهم او غيرهم من الاقارب وهذيله احتمال ضعيف او مستحيل يفضحون اهلهم ....

عالعموم كل واحد له رايي ,, ولاحرج اذا اختلفوا اثنين في الرايي
اسعدتني مشاركتج الحلوه .. وتسلمين عالمرور





راعي الفزعة

هلا فيك اخوي...

اول شي استغربت ان تحليلك للموضوع كانت نتيجته ان الفضيحه اهي الشي الاكيد .. والدليل سؤالك لي ... هذا هو الي انا مستغربه منه من الشباب ككل ... ليش يعتبرون هالشي فضيحه وعيب .... يمكن لان الغلط نابع منهم ... اذا كل واحد ماصدق سمع اسم وراح نشره ... يعني الغلط مو من احد.. الغلط من الشباب انفسهم .. ( طبعا الشباب اشكال والوان وماينطبق الكلام عالكل )

ويا اخوي جاوبي لسؤالك اهو اكيد لاء .... ما ارضى ان الشباب يتناقلون اسمي.. واتمنى تقرا ردي للاخت القلب الحزين لانه يتضمن باقي ردي على سؤالك .....
وفي النهايه احب اوضح .. ان صح كل الكلام الي انقال ان هالشي اضمن ونتجنب المشاكل احسن ..وانا مقتنعه فيه اصلا قبل لا اكتب الموضوع .. بس الي حبيت ابينه ان احنا وبايدنا فرضنا على انفسنا اشياء ووضعنا قوانين وعادات كانت من الممكن ان نتفاداها لو حسنا من انفسنا ...
ولو ماكان في شباب من هالنوع يحبون يلعبون باعراض الناس ماراح يكون لذكر الاسماء اي اضرار ... ولكن العتب على الزمن الي تغيير


شاكرتلك مروروك ومشاركتك




بنت العرب
اسيرة الليل
شاكرتلكم تواجدكم ومشاركاتكم




اختكم
المياســــة

بسم الله الرحمن الرحيم
السلام عليكم ورحمة الله وبركاتة
________
هلا وغلا بــ أختي (الميــاسة)
أشكرك على أختيارك للموضوع والطرح اللي نستغربه ..
والمشكلة ماني لاقيه سبب مقتع يخليني اوافق انه عيب
___________
فعلا لو لاحظنا..!!
بعض الشباب عيب عندهم يقول اسم أخته او زوجتة صريح..
ليش..؟
لانهم متعودين .. خلاااص حاطين في بالهم انه عيب وخلاااص

ويمكن شدني سؤال لــ أخونا (راعي الفزعة):
يمكن اتدخل ..وبقول وجة نظري ..
يعني وش بيكون شعورنا ... لما اسامينا تنقال امام الشباب..

أخــــــــــوي..

~ نوقف لحظة صدق.. وخلينا صريحين..
اسم .. يعني كنية لانسان ... مووو صوره ..او اي شي ثاني..

~ فيه كثير من أخواتنا .. مسجلين بــ أساميهم ..
اختلف الوضع .. سبب فضيحة لها ..
عرفناهم ...

طبعا ... لا...

يعني في الاول والاخير بيظل أسم مناداة لشخص آخر...
فلما هذا التضخيم بالامر .. عشان اسم؟؟
:
:
انا ادري انه تعود .. وفكرة تداولت بين الشباب وترسخت ..
:

وفعلا الرسول صلى الله علية وسلم وصحابته الكرام كانوا يذكرون اسماء زوجاتهم وبناتهم
~ في بعض الردود ذكرت :

تقارنون زمنا بزمن الرسول علية افضل الصلاة والتسليم
نعم .. لانقارن..!!
بس ..!
((هذا قدوتنا وقدوة البشرية كلها))
ليش مانتعلم منه ونشوف كيف كان قوله وفعله ..!!
نفعل اللي أمرنا به ونجتنب اللي نهانا عنه
واعتقد ان الرسول علية افضل الصلاة والتسليم ..
مــــــانهانا عن ذكر أسم المرأة أمام الرجل,,؟
فليش خليناه عيبا ..!!
:
اكرر شكري
ولكي خالص احترامي
وجزاك ربي ألف خير
:
أختك
:

ضنا الشوق

ياهلا ومرحبا الغاليه نور الموضوع بمرورج ...
اثلجتي صدري بالكلام الي كتبتيه ... والله احس انج دخلتي فعقلي وقلتي الكلام الي كان ودي اقوله بس ماعرفت اشلون اترجمه ...

فالاسم ليس سوى كنيه لصاحبه وليست صوره ... ولم ينهانا الرسول عن هذا الفعل ... وهذا شي لاخلاف عليه ... لكن ايش تسويين في مجتمع غلبت عليه عادات وتقاليد يلزم الناس فيها حتى لو كانت خاطئه .. والمشكله ان الناس بايدهم فرضوا على انفسهم هالقيود

اشكرج الغاليه عالمشاركه الي اسعتدتني .. ولاتحرمينا من مرورج في المواضيع الجايه باذن الله

اختج
المياســـة

مرحبا الساع


مشكوووره الغاليه عـ الموضوع ...




والسبب برايي ان الحينه الزمن اتغير .. وتفكير الناس بعد اتغير ..


يعني اذا طرى الواحد اسم اخته او حرمته ... يمكن ربيعه يفكر فـ شي ثاني ..



عسب جي منقوود




ومشكووره مره ثانيه


والسموحه