موضوع الأسبوع للكاتبة : حمران النواظر

السلام عليكم...

كيف الحال اختي حمران..

بصراحه ماقريت كل المواضيع اللي انطرحت بهاللقاء..

بقول اللي عندي واتمنى ماكون طرحت اي فكره انطرحت من قبل..

--------------------------------------------

في البدايه (نظره حب)..

في اعتقادي الشخصي.. واقول بس في اعتقادي طوني لا ناقده ولا اديبه..

بس اطرح وجهة نظري كقارئه ..

بدايه بديتي بالفصحى.. وبعدين حولتي عامي..

لحد هني الموضوع مقبول..

بس لاحظت في الفتره الاخيره ان معظم الاجزاء كانت بالعاميه ولكن لسبب ماعرفه بدت بعض الجمل الفصحى تدخل بالموضوع.. اكيد شي عادي.. بس في وجهة نظري تسبب تشويش للقارئ..
بصيغه ثانيه.. ماعرف ليش هالتحويل او استخدام الجمل الفصحى في نص الجزء!!!

على سبيل المثال لا الحصر: في وسط الاحداث والجزء وانتي توصفين مشهد معين تقولين (ردت على عقبها.. او قيد انمله.. او النبؤه على وشك التحقق.. وفي جزء اخر ذكرتي.. "تتنفس بقوة بسبب الادرينالين اللي تدافع فيها من شدة الحماس"..)

وجهة نظري يا اختي العزيزه ان هالتحول المفاجئ في وسط مشهد ساخن يشوش ذهن القارئ ويقطع شوي من اندماجه.. كفايه التحول الاولي من الفصحى للعامي.. المفروض يصير لج خط معين او اتوجه معين في اختيار اللهجه اللي تحبين تكتبين فيها قصتج مو لاي سبب معين.. بس عشان يزيد من تماسك القصه وترتيبها..


شي ثاني..

نظره حب وقمر خالد..

واتوقع الكثير غيري قاله طرح عليج الموضوع من قبل..

بس انا مابقولج وجهة نظري..

نشوف التشابه اللي بينهم..

البطل له ماضي ومازال قلبه مشغول بوحده ثانيه..

البطله متوهمه انها على علاقه حب وفي الاخير تكتشف انه كان وهم وماتحب الا زوجها..

يكتشفون بعض عدل ويبتدي حبهم بالغربه..

وجود شخص "شرير" يبي يخرب من بينهم.. في نظره حب مشعل وفي قمر خالد كانت حبيبة خالد القديمه ندى..

ماتتوقعين ان هالخطوط العريضه هي اللي تحدد اساس القصه.. ولسبب ما التشابه كبير..

بغض النظر عن الزمن والمكان وتسلسل الاحداث.. في النهايه محاور القصه متشابهه..

شي ثاني.. لسبب ما قصصج تذكرني بروايات عبير..

اقصد من ناحيه اللي يحب وبعدين حدث من شخص ثالث حقود يبعدهم عن بعض وفي الاخير يرجع الحب عقب مايتعذب المحبين..

يمكن يكون مجرد احساس شخصي..

هذا اللي في بالي الحين..

يمكن ارجع لج مع بعض الملاحظات مره ثانيه..

يعطيكم الف عافيه
وعساكم على القوه


((قطرية))

السلام عليكم ورحمة الله وبركــاته..

احب اشكــر الكـل على مداخلاتهم الحلوة وخصوصا ابي معــا.. صدقيني انا بصدد زيارة كم طبيب نفســاني بسبب هالصفة اللي فيـني لانها مكشتة كل الناس عني.. اعوذ بالله من بليــس..

الغاليـة ابي معا والاخت قطرية.. باخذ نقطتيـنكم مع بعـض..

يمكن الكل يظن ان قمـر خالد مطابقة او مقابلة لنظـرة حب.. على عكـس كلامـي.. نـظرة حب ما تكلمــت عن الزواج المدبـر المحكـم.. نظـرة حـب ما كان المفـروض انها تصـير رومانسية اصـلا.. كانت من المفـروض انها تكـون اجتمـاعية.. تتكلم عن طبـقة اجتمـاعية مختـلفة نسـوها معظم الكـتاب اللي هنـي.. صح ان القصـتين متقابلـتين في بعضـ الاشـياء .. لكن بعدهـا النهايـة ما انحطـت .. وكل شي جايـز اللي كانو في يوم متقابليـن .. ما راح يكـونون متقابلين

معظـم القصص يا الغالية فيها طرف ثالث.. دايمـا .. ان ما كان احد الشخصيات.. فراح يكـون راوي القصـة نفسـه.. في حيـاة كل انسـان الطرف الثالث يتواجد.. من خلال عيـب او خطأ في الشخصيـة.. ولكن انا معاكم في ان بعض الاشياء تكررت في نـظرة حبـ.. يمكن من حبي الشديد لقمر خالـد لا تنسـون كنت توني مخلصـتها..

التغيــير في اللغـة..

وش اللي احلى من تخالط اللغتين.. الفصحى والعاميـة.. اذكر في مسـابقة القصص في المنتـدى كانت من القوانيـن الممنصـوصة في المسـابقة ان تكون العامية مطعمة بالفصحى.. انا انتقلت من الفصحى للعامية لان صراحة معتزة بالفصحى على الرغم من قلة ضلوعي بهـا..ما حبيت اواصل لان ما ابي اغلـط وان غلطـت ما بقدر اصلـح الاغلاط لاني مثل ما قلت مافهم فيـها..

انتي يمكـن تلاقيـن صعوبة في التعامل مع اللهجتين.. بس في غيـرج يمكن يرتاح لهالشي.. انا احس ان العاطفة فصحـى.. والتصرفات عاميـة.. همجيـة بالاحـرى.. والكـارس كانت شديدة الوصـف والسـرد والتعابير لسبـب.. والسبـب اهو ان هالشخصيـتين موجودتيـن في حيـاتي ولاني كنت اخذ مقرر englr 217 و englr 215 اللي ذابحيني من زود الوصف والسـرد.. صدقيني.. لو تنطلقين وتقرين معظم القصـص الاجنبية ومنها the great gatsby بتلاحظيـن كيف ان السـرد يملـلج بالقصـة.. ولكن بالقراءة المعـادة بتتحسفين وتقولين: يا ليتني اقدر اكتب بمثل هالروعة..

ما اقول اني مثل كاتب قاتســبي.. بس احس بالوصـف.. وان طـال تحلى القصـة..

الاخ جوكر العيـن اعتذر منك رسميـا بسبب الجمـلة.. كلامك صحيــح.. ما كان لازم استخـدم هالجملة.. لان لا حكم بهالدنيا الا القرآن.. سلمت اخــوي..

الأخت انيـن الصمـت ..

انتي بعـدج ما كملـتي القصة اذا كنتي تقرينها.. so don't jump up ur horses انتظري وشوفي.. اذا كنتي تقرينها يعني.. او انها من القصص اللي تفكرين بقرائتها..



انتي يمكــن لا.. بس انا اي.. بمــوت.. لان الحـب اساس كل وجود.. اساس علاقاتـج كلـها.. مع كلا الجنسين من مختلف العلاقات والرسميـات.. حتى علاقتـج بربج.. او دبج ا اللي تحطيـنه على مكتـب الكمبيـوتر.. :

وما على كلامج اي اختلاف ان الحب من بعد الزواج اارقى واسمى الحب.. بالله عليج كاتبة قصة فاقت صفحاتها ال600 عن الحب من بعد الزواج... ما فهمتي رأيي بهالنوع من الحب؟؟؟


اي شي يـقام باسم الحب الطاهر العـفيف.. لا يمكن تدنيـسه.. راح يـكون اقـرب الى القـداسـة..
شوفي حـب ممتاز وشاه جهـان.. بقـى صرح لا ينهـدم.. ومزار ومسـجد للصـلاة.. تظنين لو كان فيه شعـرة من الدناسـة كان بيظـل حتى هذي الفتـرة؟؟

محد انولد غبـي يا اختـي.. والحبـ الصادق الحقيـقي اللي ينبذل عشـانه الدم.. ما يكـوون دمـار .. والشات والتـلفون مو سبيـل لغايـة الحب.. هذا اللعب.. وفي فرق بين اللعب والحب.. وانا ما ذكرت شي من اللعـب في قصصـي الا ولد العـم.. لان كانت غشاشة المراهقـة بعدها على عيـني..


good for you اتمنى لج كل السـعادة.. بس انتي مو العالم كله.. وما تقدرين تفكــرين بدل العالم.. على الاقل ما تقـدرين تفكـرين عنـي.. : ولا اظنـج تبين صح؟؟


الكمـــال لله مو لبنــي ادم.. يمكـن انتي طفـرة من نوعــج اختي واحســدج صراحة.. لاني على ما قال عبد المجيد عبدالله " كلنا نشـكي فراغ العاطــفة" انتي لا.. فهذا للاحسن لج.. اتمنى لج دوام الكمـال..

وانا فيـني نقص.....

ما احلى الشـعور.. وكاني معـترفة اني ماكلة ايسكريم اخوي اللي كان بالبرادة.. ..


باعتقادي.. لا..

ليش لا.. بقول لج ليـش..

اولا المقطع انحذف عشـان سطـر واحد وانا متاكدة انج حافظته.. ..

ليش يمـثل الحب السامي..

اولا المقطـع ما كان الحلم الوردي اللي انتووو معارضيـنه.. كان يتكـلم عن مواجهة من مواجهة ازواج في بداية حيـاتهم الزوجيـه.. مو انتو تقولون الزواج مب كله رومانسية اب رومانسية.. هذا ما كان موقف رومانسي.. هذا موقـف تحـدي.. والغلبـة كانت للخـوف اللي استحل اكبر قدر من الاثنيـن.. انا ما اعتبـره موقف رومانسي.. كان موقف تحـدي..

وما كان مشـهد اللي حاربـوه.. كان جزء كامل.. انا مادري يعـني على جملة وانا كنت موافقة على تغيــيرها اهـي بـس.. لانها يات من شـدة الحمـاس..<< ضبطي روحج لااا..



ليش يعـني؟؟ مو قـد المقـام الشيـخة؟؟؟ انا اتــوق لمعـرفتج بس الظاهر اني ما اشـرفج.. my bad
وعلى فـكرة.. في حيـاتي كلها ما تقبلت انتقاد احد غريب.. الاقربون اولى بالمعـروف.. صح ولا لاء.. يكونون عارفين لشخصي وتفكيري ومعتـقدي.. لكن انتي غريبة بالنسبة لي.. وما عرفتج للاسف الشديد الا في مواقف ما احب ارجع لها لانها كانت ممــلة ومالها داعـي.. لذا انتقاداتج غيـر مقبـوله عندي..


-----------------------------------------------------------


اعيــــد شــكري لكل اللي بذلو جهد.. بارك الله مســعاكم.. ونصائحكم ماخوذة صدقووني.. واشكر اللي بررت لي - ابي معا- على صغـر سنـي..

بس الغاليـة.. في ولاية التيبت.. من يحكم الشـعب اهو طفـل.. يا تـرى شالحكمه من هالشـي؟؟

------------------------------------------------

حمران النواظر

كيفج الغالية؟؟

انا قرأت من قصصج قمر خالد وولد العم ونظرة حب

قصة قمر خالد وصلتها لـ 13 بنت في السعودية مابين جده وابها

والكل اثنى على القصة واسلووبك الرائع فيها..

وفعلا بدوون مجاملة انتي مبدعة..

بس احس انج تعصبين بسرعة

---> هذا الي حسيت به من خلال ردودج في الموضوع

وعندي كم سؤال وكم تعليق


سـ1ـ يوم تكتبين القصة.. عندج هدف معين او فكرة تبين توصلينها للقراء ؟ وايش هو الهدف؟

سـ 2ـ تعقيبا على كلام اختي ( قطرية ) فعلا ليش نلاحظ ان فيه تشابه في المحاور الأساسية في قصصج؟؟
طبعا مع وجود الاختلاف في طريقة الطرح والاسلوب..لكن يظل التشابه واضح..

سـ 3 ـ بعد في هذا السؤال يتبع رد ( قطرية ) ..
في بداية نظرة حب كانت القصة بالعربية الفصحى.. وانا عيبني هالشيء.. لان اللغة العربية فيها مفردات كثير تساعد الكاتب..
خصوصا يوم توصفين موقف او توصفين شكل بنت مثلا..تحصلين مفردات واااايد تساعدج..وهالمفرادت ماتقدرين تحطينها في قصة كتبت باللهجة العامية..وعالرغم من انج ماكنتي متمكنة من اللغة ذاك الزوود لكنها ساعدتج وااايد..

سـ 4ـ تعليق على الحب وكرهج للمجتمعات الخليجية بسبب هالشيء

اكره المجتمعات الخليجية فوق التصـــور.. لانها احباط وقــتل لكل شعاع امــل.. حرمو الحب والله خالقه فطــرة في قلوووب الناس.. انا خليجية.. واكره المجتمعات الخليجية..

اوكي الحب فطرة في الناس...كلامج صح 100%
بس أي نووع من الحب هذا الي حرمته المجتمعات الخليجية؟؟؟؟؟!!!
فهميني شلون تبين الحب هذا يصير؟؟؟؟؟؟!!
وحتى لو حرمت المجتمعات الخليجية هذا الحب.....
فالحب احقر من اننا نكره مجتمعاتنا علشانه...
خل نعيش قساه وجلفين......بس مانكره هالوطن...
ادري كلامي مايدخل العقل.....لكن الشاعرة يقووول :

بلادي وان جارت علي عزيزة
واهلي وان بخلوووا علي كرام

الحين بس قولي لي.....شنوع الحب الي حرمووج منه؟؟؟

الخط الاحمر اللي تتكلم عنه.. لا وجود له بحيــاتي.. انا بعد بنت.. ولي سمعـتي .. ولي نيــتي.. وبعدني بنت يعني مااا تطاولت على شي خــاص.. وما ذكــرت شي منبووذ.. صدقني يا اخوي انا بنت ملياااانة بالكره والتنفر من المجتمعات واللي يصير فيــها..

شلون يعيش الانسان بدووووون خط احمر..
الخط الاحمر يمثل القانون..
والحاجز الي منع تجاوزه..
لو كل شخص بهالدنيا ماعنده خط احمر فحياته كان راح تستوي فالدنيا فوضى..
كل شخص يتصرف على هواه...وبالطريقة الي تعجبه..
الخط الاحمر شيء مهم..وان كان يشير الى ( ممنـــوع) لكنه مهم...
حتى يحس الانسان في اكو شيء يضبطه..واكو شيء المفروض مايتجاوزه..فيه قانوون..وحدوووود...

والا شرايج؟؟؟

وفي النهاية...هذي مجرد اختلافات في وجهات النظر...[Automated by GetSmile]

المفروض انها ماتزعل حد...

ولي باااااااااااااااك

أختي الفاضله حمران النواظر

ماعتقد كل قراء منتدى الم يعرفونج معرفه شخصيه ؟ عشان تتقبلين نقدهم !! واذا انتِ ماتتقبلين الا نقد الاقارب فا ليش وافقتي على موضوع النقد بالاساس !!

انا نقدت اشياء تقبل التطوير والتغيير .. واتقولين نقدج مو مقبول ! مو مشكله يالغاليه احنا لازم ننصح ونوجه .. واللي بيتقبل بيستفيد وراح يتقدم خطوة للامام.. واللي ماراح يتقبل ماراح يتقدم خطوه بالعكس بيظل في مكانه ..

وانا يا اختي كنت ابيج تطورين من امكانياتج .. دام عندج قلم رائع اخدميه بأفكار تساعد المجتمع اهداف تصلح المراهقين .. والمشكله ان قصتج الجديده راح نتنتهج مثل نهج ماسبقها .. !

واذا قلت اني هني مو بغرض المعرفه ماقصد فيها الاهانه والعياذ بالله .. ولكن انتِ كنتِ تقولين انتِ لالحين ماعرفتيني .. اختي انا هني مو الواجب على اعرف كل شخصيه كاتب .. اللي علي اقرى قصته لان القصص اهي عباره عن انطباع شخصيه وبيئه وافكار الكاتب نفسه ..

همسه اخيره : اختي الفاضله لا تحطين فبالج ان اي عضو نقدج فهو عدوج.. بس ابيج تعرفين ان محد ينقدج الا يبيلج الخير ..

اختج / انين

لا تعصبين حمران النواظر..ريلاكس كل شيء ولاتعصبين..

بالنسبة ليي قصصصج وايد حلو..والا يقول بس المراهقين الا يقرونها هذا غلطان صح الشريحة الكبيرة من المراهقين لكن هناك عدد لا يستهان به من الشباب على الاقل عندنا بالبحرين..او بالاحرى الا حولي..الى درجة ان قصصج يسونها برنت..وتتنقل بينهم..

اتفق وياج في وايد نقاط..صحيح الا قلتيه ان المخطوبين عندنا بالبحرين يطلعون مع بعض ((طبعا بعد الملجة والحفلة))..هذا مو عيب لان اذا ما تعرفو على بعض ودرسو شخصيات بعض زين شلون راح يبنون اسرة وبيت على اسس سليمة..هذا حق كل واحد يعرف تفكير ونمط حياة شريكة لان هم ما بيعيشون مع بعض يوم والله يومين بيعيشون مع بعض مدى الحياة..في هذه النقطة احنا نختلف عنها عن المجتمع الخليجي مب كل عادات وتقاليد المجتمع الخليجي متشابهه في اختلاف ويمكن اخلاف كبير بعد..لان هم عندهم منبودة يمكن والله ما ادري..او احنا شعب متحضر وافكارنا منفتحة..اللة اعلم..وفي النهاية هذا حرية رأي..كل واحد حر شنو يسوي والا هو متربي عليه ومقتنع فيه ونابع من ذاته..ومنعكس من مجتمعه..لان الفرد مرآة المجتمع..وكل واحد يعكس بيئته..

حبيت اقول لج شيء..اذا لقيتين نقد ومو اي نقد نقد لاذع(( الى درجة التهجم)) ..فهذا يدل على ان قصصج ناجحه وبشكل واسع بعد..فالانسان الناجح يلقى الكثير من النقد والقليل من الاطراء والمديح..

تحياتي لكِ عزيزتي..وفقك الله ورعاكِ..

خافي الله يالغاليه بدال ماتوجهينها وترشدينها .. تجين تقولي هالكلام ؟؟ ليش حمران ماهي اختج ؟ ليش ماتحبين لها الخير ؟ اهو بقى مدحه بالعالم ماقلتوها ؟؟ يعني تبونا نقول قصصج حلوه ويلا مع السلامه بلا نقد بلا وجع راس ؟؟ انزين شستفدنا ؟ صدقيني اي كاتب اذا مدحتيه ماراح يغير ولا يزود من امكانياته .. انتي جذي راح تعطينه بريك قوي وتقولين له اوقف مكانك لا تتقدم ..! ان مدحنا مني لي باجر الكاتب ماراح يغير شي من نفسه .. وحمران محتاجه لصياغه جديده لافكـارها .. مو كل المعتقدات اللي معتقدتها صحيحه .. لان بجذي راح تأثر على القراء .. !!

الخليج ككل شعوب متفتحه .. ولكن تحكمنا العادات والتقاليد والاعراف حكما ملزما ..

يعني اذا ملج ماطلع مع مرته مايعني ان هذا متخلف وان اللي يطلع معاها متفتح ..

الاخت حمران تقول مو لازم حفله .. لانهم شرعا زوجين .. وجنه الشرع ماقال من شروط الزواج الاشهار !! وان العالم كلها المفروض تدري انها زوجته !!

منو قالج انه عيب ؟ بس معظم الزواج بالخليج يتم على الطريقه التقليديه .. ويشوفها بالملجه وبالعرس .. ومو شرط اهي تعرفه او شافته من قبل .. لان كل واحد منهم ميقن ان الحب بيجي مع العشره قبل الزواج الكل بيطلع افضل ما عنده لكن مع الزواج والعشره راح يتعرف كل واحد على الثاني على طبيعته وراح تنخلق المحبه بينهم ... واذا بتعرف انه زين والا موزين اجل شوظيفه اهلها ؟ ليش ماسألوا عنه من الاول؟

هذا اللي كنت بقوله .. ويا اختي .. اذا انتوا تحبون حمران انصحوها .. ارشدوها .. انا اللي يحب لي الخير بينصحني .. واللي يبيلي الشين بيطبطب علي وبيمدحني ويخليني على عمـاي ..

هذا كل اللي عندي .. واعتقد حمران اهي الوحيده اللي عارفه ان كلامي صحيح .. وياليت نفكر صح ونعرف شلون نوجه قلمنا وفكرنا وهدفنا لشي يستحق الذكر ..

اختي هذا موضوع نقد .. وعلى الله نستفيد من النقد ونبرهن للناس بقصه جديده نخلي الكل ينصدم من قدراتنا بأفكارنا الغريبه .. احنا كمنتدى الم نريد ان نستغل قدرات حمران بما هو احسن .. وافضل ..

اختج / انين

ادري مشاركتي ما لها مكان اهني ..بس انين ..انتي راااااااااااااااااااااااااااااائعه .. وياللي ما يعجبه شي من كلامج .. يعرف وش يسوي ..تراه اليبال ما تهزها الرياح .. وانا معاج يا انين في كل كلمه قلتيها .. ويسلموا اختي ....


حمران النواظر ...

خليني اقولج كلمه ..

لا يغرج تصفيق الناس ..ولا يغرج صراخ المراهقين ..ياللي صدق صدق يحبك راح يقولك عيوبك .. وياللي بس يجاملك حامل عليك حقد ..........وكل ياللي يصفقون لج الحين اكثرهم مراهقين ..لو رحتي وراجعتي ردودهم اختي راح تعرفين انهم اكثر شي عجبهم في قصصج المواقف ياللي تعدت الخط الاحمر .........

ولو المجتمع الخليجي مكروه عندج ..احب ابشرج انج كرهتي الناس ياللي صفقت لج ..لانه ما شفت لج قراء لا من امريكا .. ولا من اوروبا ....ولا من جنوب شرق الصين .. كلهم خليجين .. والصراحه انصدمت من كلامج ..لاننا بكل بساطه لنا الفخر اننا مسلمين .. منبع النور من وسط الجزيره العربيه .. ولو هالنور عما عينج وحبيتي تروحين لظلمات الدنيا ..انتي حره ..بس تذكري انه بناتنا كانوا يأمنون في افكارج ..بس الحين اشوف الكثر الناس بدت تراسلني وتقولي عن كلامج ياللي جرحهم وهم ياللي كان يصفق لج ....


لا تعتبرين كلامي تهجب كثر ما هوه عتاب ..لانه الكلمه ياللي قلتيها للاخ توأم الروح كانت جارحه لكل خليجي كان يتابع لحمران ..

وعشان اكون اكثر صراحه .. ما بقيم في الموضوع هذا ..لين اعرف امنو حمران الحقيقيه ..لانج صرتي الحين بنسبه لنا انسانه غامضه .. تختفي وراء قلم الكل اختر بالوانه الزاهيه .. بس للاسف ...رسمت لوحه شينه عن افكارنا العربيه المسلمه " الخليجيه " ....

للاسف ..

الاخت..انين..

انا هنا لست بصدد ان اوجه احد لان الكل حر في رأيه وفي ما يفعل..مب مجبر انه يطبق النصيحة التي تقدم اليه يسمع النصيحة من هالاذن ويطلعها من الاذن الثانية....صحيح واجبنا ان نقدم النصيحة لكن المتلقي هو الا يترجمها اما بالشكل الايجابي او السلبي..ومن قال لج آنه ما احب الخير الى حمران وما ابي انصحها.. لكن بالنسبة ليي كفيتون ووفيتون في نصحها ما بقى شيء ..و ماقلتوه..ليش ايي واكرر الكلام..وفي النهاية كل واحد عقله في راسه وبيعرفه خلاصه..
احب اقول لج صح ان هذا مجلس نقد..لكن تم نقد حمران النواظر بنظري واشدد بنظري بطريقة استفزازية جعلتها تتنرفز وتعصب وترد بأسلوب ما اعتدناه عليها..وهي بشر يعني تخطأ ما هي معصومة عن الغلط..واذا كان الهدف من النقد هو النصح والارشاد يجب ان يكون بطريقة تجعل المتلقى يتقبلها..

ثانياً لا اتفق معكِ ان جميع المجتمعات الخليجية متفتحة..هذا غير صحيح..ابي اضرب لج مثال بالرغم انني لا اريد ان ادخل في المواضيع السياسية فمثلا في الكويت المرأة ليس لديها حقوقها السياسية بالرغم من مطالبتها بها واين مقولة ان المرآة نصف المجتمع....أهذا تفتح..وآنه ما قلت ان اذا ملج على مرته وطلع معاها هذا تفتح..هذا شيء راجع للشخص نفسه..طلع معاها ما طلع هو حر..

اذا الاخت حمران تقول ان بدون حفلة..آنه اقف أوكد لكِ كل التأكيد انهم يطلعون مع بعض بعد الحفلة والاشهار بالزواج..ما بييب الكلام من عندي..

بالنسبة لي على الاقل..ان الزواج التقليدي اصبح على المحك والاندثار..في ظل الوضع الحالي الذي نشهده من تطور وتكنولوجيا..وبالنسبة للأهل اكيد بسألون عن الريال وما بيوزون بنتهم واحد موزين..واتفق وياج ان الحب يجي من المعاشرة بعد الزواج..لكن الاختلاف في الرأي لا يفسد للود قضية..واحنا هني يايين من منطلق مختلف في طريقة التربية والتفكير..وكلنا عارفين هالشيء

ربما اختلف معكِ في كثير من النواحي و اتفق معكِ في غيرها..وفي النهاية هي كلها وجهات نظر تحتمل الصواب والخطأ..ورضى الناس غاية لا تدرك..

تحياتي لكِ

بسم الله الرحمن الرحيم
السلام عليكم ورحمة الله وبركاته



بعد أن قرأت مادار في هذا الموضوع الذي كان لا بد أن يكون موضوع نقد لا تهجم على بعضنا البعض ..


اخوتي واخواني في الله

قد اسئتم لفهم معنى النقد ،، فالنقد هو تبيان المواضع الإيجابية والسلبية للكاتب مع توجيهه وهو بدوره يجب عليه تقبل كل ما يقال عنه ويفكر بعقله ويرى أن اخطأ لا أن يدافع عن نفسه ويكذب الآخرين ويتهجم عليهم بأنهم يسخرون منه ويحاربونه !!!!

نحن لسنا في معركة ولا اظن بأن الكره للشخص نفسه يجبر الشخص على كتابة مثل ما قرئنا من الكلام ..

نعم واعترف لست بقارئه ولكني تابعت حواركم في هذا المجلس المخصص للنقد وليس للمحاربة فعلى الاعضاء والمستضيف احترام بعضهم البعض وعدم قلب الموضوع الى حلبة صراع ..



إن تعدى الكاتب أو تعدت الكاتبه في قصصهم حدود الأدب والقوانين فمصير قصصهم هو التعديل وإن لم يستجيبوا الحذف ..

فديننا لم يحثنا على شرح العلاقات الحميمه بين الزوجين او تعدي الخطوط الحمراء كما اسلفتم في قولكم ودعوني اطرح بين ايديكم حكم كتابة القصص واتمنى من الجميع الفهم ..


هل يجوز قراءة وكتابة القصص والروايات الخيالية ؟
الجواب :
1. أما قراءتها فهو من تضييع الوقت ، والإنسان ينخدع بالفراغ الذي يجده في حياته ، وهو مما سيسأل عنه يوم القيامة .

- عن ابن عباس رضي الله عنهما قال قال النبي صلى الله عليه وسلم : " نعمتان مغبون فيهما كثير من الناس الصحة والفراغ " . رواه البخاري ( 6049 ) .

ومغبون : أي : مخدوع .

- وعن أبي برزة الأسلمي قال قال رسول الله صلى الله عليه وسلم :
" لا تزول قدما عبد يوم القيامة حتى يسأل عن عمره فيما أفناه وعن
علمه فيم فعل وعن ماله من أين اكتسبه وفيم أنفقه وعن جسمه فيم أبلاه "
رواه الترمذي ( 2417 ) وصححه .

2. وأما الكتابة ، فإنه بالإضافة لما سبق من أن فيها تضييع الأوقات ، فإن فيها محذوراً ثانياً ، وهو الكذب ، وهو ما لا بدَّ منه ليتم حبك الصور الخيالية والتي لا واقع لوجودها .

وإن كان لا بدَّ فاعلاً فليكتب عن الشيء الذي له وجود في الواقع مما في حياة الناس الآن ، ويكتب آخذا العبرة والعظة والفائدة من حدث حقيقي حصل له أو سمع عنه ، أو ليكتب على طريقة ضرب المَثَل ويذْكر ذلك في المقدّمة ، والأعلى من ذلك والأولى أن يكتب عن القصص الحقّيقية والصحيحة التي وردت في القرآن والسنّة أو يكتب عن سيَر وحياة الشّخصيات الإسلامية العظيمة كالأنبياء والعلماء والصّالحين أو قصص الأمم السابقة التي قصّها الله علينا ، بأسلوب تشويقي وجذّاب لا يحرّف فيه ولا يُضيف ما لم يحصل وما ليس له به عِلْم ، وكذلك يسوقها بأسلوب سهل ميسّر مناسب للأطفال وليوجّه في كتاباته إلى الخلق والفضيلة .

وللمزيد : راجع السؤال 3324 .

والله أعلم .

الإسلام سؤال وجواب
الشيخ محمد صالح المنجد (www.islam-qa.com)



المعنى من كل هذا ستقولون بأننا لا نكذب وهذا حاصل بين أي زوجين !!
ولكن هل ماتكتبونه حقيقة هل حصلت بالفعل تلك الأحداث ؟؟
وأي فائدة أو موعظه ينتظر منها القارئ في نهاية القصه !!؟؟



أي حرف وهنا أأكد بأن أي حرف يخرج منكم يا عباد الله فأنتم محاسبون عليه يوم القيامة وسجلكم لن يترك لا صغيرة ولا كبيرة إلا واحصاها فلا تقولون حينها ويلنا مالهذا الكتاب لم يترك صغيرة ولا كبيرة إلا واحصاها ..

فكيف تريدون أن تكون سجلاتكم يوم القيامه ؟؟

لديكم موهبة فاستغلوها في مرضاة الله وليست لمرضاة العباد


يغلق الموضوع لأنه تم التمادي فيه ولم يخرج بأي نتيجة ايجابية للأسف الشديد ..