|
|
|
|
|
|
||
| إعلانات منتديات ألم الإمارات |
|
|
|||||||
| مجلس الحوار و المقالات مناقشة القضايا الإنسانية والفكرية و الأحداث الراهنة ، يمنع نشر المشاركات المنقولة . |
 |
|
|
LinkBack | أدوات الموضوع | تقييم الموضوع | طرق العرض |
|
#1
05-30-2005, 04:05 PM
|
||
|
||
مسرحية مجلس ((الحوار والمناقشات )) .. (( الجزء الاول ))
السلام عليكم ورحمة الله وبركاته ...
مسرحية مجلس (( الحوار والمناقشات )) … ابطال المسرحيه من الرجال : موت غاوي – موت عيناوي – السيف – جرح الامارات – عبد الناصر – اماراتي – بلاير … ابطال المسرحيه من الفتيات : شموخ الامارات – وّد – طيف النور- مرسوم العيون – همس القوافي - سجى الليل- الخواطر- مرفوعة الراس … ضيوف الشرف : والدة بلاير واخته الصغرى – والدة موت عيناوي – والدة موت غاوي … المناسبه حضور احتفال تخريج بلاير من الجامعه بدرجة ضعيف وناجح جوازاً … ………………………… الترتبيات على قدم وساق لاستقبال الحضور .. والدة بلاير تتصل في والدة موت غاوي وتحثها على القدوم سريعاً لمساعدتها في الطيخ وتجهيز الطعام قبل حضور الضيوف بعدة ساعات … ام بلاير : اوووووووف وين انتي يام موت غاوي تاخرتي وايد ما باجي شي وورنا شغل وطبيخ .. ام موت غاوي : بلاج انتي حشرتينا ويا ولدج بلاير لو ناجح بأمتياز شو بتسوين عيل … ام بلاير : المهم نجح بأمتياز والا غيره .. يالله تعالي ابسرعه ما في وقت … ام موت غاوي : يالله انا لابسه عباتي وطالعه ويايه صوبج .. بلاير يتصل في موت غاوي … بلاير : اين انته ولماذا لم تاتي الى الان ؟ وهل اتصلت في الشباب لكي يأتوا ام لا ؟ .. موت غاوي : بلاك اتكلمني باللغه العربيه الفصحى وين امفكر نفسك في المنتدى انته ويا راسك … بلاير : اووووه نسيت عمري ياخي المهم اتصلت في موت عيناوي وجرح الامارات والسيف واماراتي وعبد الناصر .. موت غاوي : اتصلت فيهم وعقب صلاة العشاء بيكونون موجودين عندك في البيت .. بلاير : عيل خلاص بخلي اختي تتصل في صديقاتها اللي وياها في المنتدى علشان يحضرون العزيمه … موت غاوي : خلاص اوكي وانا بسير الحلاق الحينه عيل بتكشخ دام السالفه فيها بنات .. بلاير : تعال بو الشباب انته امفكر نفسك بتشوف بنت من البنات اللي بيحضرن العزيمه .. موت غاوي : عيل ليش بتخلي اختك تعزمهم .. مب علشان نجلس مع بعض ونتناقش ونتحوار ؟ .. بلاير : مالت عليك هاللي قاصر بعد اخليك تجلس ويا البنات وتتناقش وياهم اشكره .. لا ابويه البنات بيكونون ابروحهن في مجلس الحريم ويا الوالده ووالدتك ووالدة موت عيناوي واختي الصغيره .. موت غاوي بينه وبين نفسه اووووووف في هالمعقد هااا … موت غاوي : خلاص انزين بمر عليك عقب ساعه واذا قصرك شي اتصل بي وخبرني … بلاير : اوكي الله يحفظك بااي … بعد ساعه موت غاوي يحضر ويتبعه موت عيناوي ووالدته .. والدة موت عيناوي تنضم لمساعدة والدة بلاير ووالدة موت غاوي .. موت عيناوي : هلا شباب شو الاخبار ان شاء الله مرتاحين .. موت غاوي كالعادة يجامل : هلا والله بموت عيناوي وانا اقول ليش دبي نورت فجئه وبيتكم بلاير هالمظلم صار شرات الشمس من نورك اخوي موت عيناوي .. بلاير جاف بطبعه : هلا اخوي موت عيناوي تفضل الغالي البيت بيتك .. موت عيناوي يرد على موت غاوي : والله النور نورك الغالي ونور بلاير صاحب القنابل والمدافع اللي ما ترحم .. بلاير : اخي الكريم ليس هناك قنابل او مدافع لا سمح الله وانما هي هموم متراكمه يحملها قلبي واقذفها على ورق المنتدى فتتشكل حمماً وبراكين تتفجر لتصيب الهدف احياناً واحياناً اخرى لا تصيب .. موت غاوي : اووووف بدء يتكلم باللغه العربيه الفصحى ياخي اسكت عنه هذا معقد وطفرنا في المنتدى ياخي ما يعرف يكتب شيء يخلي الواحد يفرح اشويه على الاقل .. موت عيناوي : اسكت ياخي موت غاوي نحن في بيت الريال مب زين عليك اتقوله جيه .. موت غاوي : ما عليك منه ما يزعل من كلامي ويعرف ان قلبي ابيض واني احبه في الله حبه لا يعلمه الا الله .. بلاير : اقول فكونا خلاص نحن نبا نضحك وانفرفش اشويه واليوم عزيمتي وانتوا يالسين اتقطعوني من الحين قبل ما يوصولون الضيوف .. موت غاوي : هههههههه طاعوا منوه يبا يضحك هههههههه والله دنيا .. بلاير: شو مب عايبنك يابو الشباب .. موت عيناوي : انتوا اثنينتكم خبايل وشرات الدياجه كيف اتجابلون بعض كل يوم ما ادري .. موت غاوي : شو اسوي الله بلاني بهالرفيج بلاير : قم قم بس قبل ما فقد اعصابي وخلني اسير اشوف العيايز شو يسون في المطبخ .. بلاير وهو خارج من مجلس الرجال تناديه اخته الصغيره بلاير بلاير .. بلاير : نعم شو فيج انتي بعد .. اخت بلاير : عفاني الله انته دومك امعصب .. بلاير : لا امعصب ولا شي قول شو تبين ؟ . اخت بلاير : انا اتصلت في شموخ الامارات و وّد و طيف النور و مرسوم العيون و همس القوافي و الخواطر و مرفوعة الراس و سجى الليل … بلاير : انزين شو قالوا ؟ اخت بلاير : شموخ الامارات والله حبوبه وطيبه اول ما اتصلت فيها وعزميتها قالت خلاص بتكون موجوده بس على شرط ان لازم اتشل وياها (( مقص الرقيب )) .. قلتلها ليش مقص الرقيب .. قالت لان اخوج لسانه طويل ويباله قص في بعض الاحيان .. قلتلها صح كلامج وما عليج منه وتعالي وشلي وياج مقص الرقيب و (( حبل المشنقه )) اذا حبيتي .. بلاير : بارك الله فيج يالنسره .. انتي اختي الصغيره وجيه اتقولين عيل الغرب شو يقولون يالعله .. اخت بلاير : المهم انا اتصلت في البنات وعقب الصلاه بيكونون موجودين كلهم بس يمكن مرسوم العيون ما تحضر العزيمه لان اخوها الصغير عنده امتحان وتبا اتعلمه .. بلاير : المهم انتي سويتي اللي عليج وما قصرتي والحين فارجي عن ويهي لان عندي شغل … اخت بلاير بينها وبين نفسها : متى هالانسان بيحترمني ما ادري ؟!؟! … بلاير ينادي على والدته : الوالده والوالده .. ام بلاير : نعم بلاير شو بغيت ابويه .. بلاير : لا بغيت اسئل اذا بيغتوا شي والا قصركم شي لان المعازيم خلاص بيحضرون تقريباً عقب ساعه وما في وقت .. ام بلاير : لا ابويه ما قاصرنا شي وبس قاصرنا انك تضحك اشويه ولا اتم امبوز وشايل هموم الدنيا على راسك وانته بعدك صغير ما طلعت من البيضه .. بلاير بابتسامه مصطنعه : هه الوالده شو اتقولين جيه انا امبوز دايما يعني ولا شو اتشوفيني انتي ؟؟ ام بلاير : ابويه انته شايل الدنيا على راسك والدنيا ما تسوا شي .. اضحك واستانس ويا ربعك اليوم .. ومب تفضحنا واتم ساكت وامبوز في مجلس الريايل شرات الواحد اللي عنده عزاء .. ترا اليوم حفلتك لازم تضحك يالوغد .. بلاير يحاول يهرب من تقطيع امه : خلاص خلاص الوالده انا ساير بشوف الربع وصولوا والا لا .. ام بلاير : الله يحفظك ويحفظ ربعك يا رب العالمين … تبدء الوفود بالتوافد على بيت بلاير وتقوم اخت بلاير باستقبل البنات والذهاب معهم لمجلس الحريم .. بلاير يستقبل الشباب ويرحب بهم ويحاول ان يصطنع الابتسامه بعد ما تهزء من والدته قبل قليل .. في مجلس الحريم .. اخت بلاير : هلا بكم بنات حياكم البيت بيتكم شموخ الامارات : هلا اختي تسلمين الغاليه والله ما قصرتي وفيكم الخير سجى الليل : ان من اداب المجلس هو عدم الخوض في احاديت تمس الصالح العام والمجتمع .. طيف النور والخواطر يتهامسون : شو فيها سجى الليل وين فاكره نفسها في مجلس التعاون الخليجي والا وين ؟ همس القوافي : بارك الله فيكِ اختي سجى الليل .. وّد : انا بقولكم شي النقاش لازم يكون فيه احترام لصاحب الموضوع اوه سوري اقصد لصاحب البيت .. شموخ الامارات بينها وبين نفسها : هي اللي بتخليني اطلع من طوري اليوم صغيرونه ولسانه اطول من شارع الشيخ زايد اووف منها .. اخت بلاير : انزين بنات ما خبرتوني شو رايكم في اخويه بلاير في المنتدى ابا راي مرفوعة الراس ممكن اتخبرني الله يخليج .. مرفوعة الراس : شوفي بدون مجامله بقولج شي يا اخت بلاير .. هذا اخوج ما عنده سالفه طايح سب في الخلق اشكره ويقول كلمات ساعات الواحد يستحي يذكرها احتراماً للمستمعين .. اخت بلاير: انزين ما عليكم منه هذا متعقد اشويه حتى في البيت دومه عفاني الله امبوز وحزين .. شموخ الامارات : انزين يمكن الريال عنده مشكله عاطفيه ولا شي .. اخت بلاير : ههههههههه بلاير عنده مشكله عاطفيه اونه .. هذا معقد تعرفين شو يعني معقد .. ما يعرف يحب والبنت اللي راح تتزوجه الله يكون في عونها المسكينه .. همس القوافي : اختي الكريمه اخت بلاير .. لا يجوز ان تتكلمي بكلام كهذا عن اخ لكِ وهو كما عهدناه انسان خلوق ويكتب الواقع ويصور معاناة الفقراء والمساكين ولا يخوض الا النقاشات الجاده مع الاعضاء في المنتدى .. الخواطر : اوووف فكونا من المنتدى الحين .. عطوني صحن الحلويات خلوني اكل اشويه .. طيف النور : مالت عليج الحلاويات عقب الاكل مب قبل الاكل .. الخواطر : انتي انطبي وخليني اشوف شغلي ويا الصحن .. تدخل ام بلاير وام موت غاوي وام موت عيناوي مجلس الحريم ويقومن البنات للسلام عليهن .. في مجلس الرجال .. بلاير : هلا شباب حياكم والله نورتوا المكان بوجودكم … اماراتي : المكان امنور بأصحابه يالطيب .. موت غاوي كعادة يدخل عرض في كل سالفه : هههههههه شفتوا بلاير اونه امسوي عزيمه علشانه تخرج من الجامعه .. بس السوال يا شباب ما قلتوا تخرج بدرجة شو ؟ السيف باللهجه السعوديه : وش تقول يارجال كم كانت درجته ذا النحس ؟ موت غاوي : ههههههه خلوه هو اللي يقولكم انا ما لي خص .. بلاير بخجل واحراج شديد : ابصراحه انا نجحت وتخرجت ومب مهم عندي بدرجة كم تخرجت .. موت عيناوي يحاول يغير السالفه : تعالوا ما خبرتوني يا شباب مباراة العين اللي بيلعبها ضمن بطولة ابطال آسيا للفرق متى بتكون ؟ اماراتي بكل خبث : انا بقولك متى المباراه بس قبل خلنا نعرف بلاير تخرج بدرجة امتياز والا جيد جداً ؟ موت غاوي : هههههههههههه بموت من الضحك يا جماعه .. السيف : يا ورع اثقل اشوي .. عبد الناصر : اقول شباب انا يوعان يالله حطوا الاكل وقته الحين ولا شو السالفه ؟ بلاير : ابشر الغالي ثواني بس والعشاء جاهز بلاير ينادي على موت غاوي وموت عيناوي لاحضار معه الصحون من المطبخ .. في مجلس الحريم .. ام بلاير : هلا بنات فديتكن والله يخليكن حق اهليكن ما شاء الله عليكن كل وحده احلى من الثانيه .. ام موت غاوي : الا اقول ام بلاير شو رايج في هالبنت شو رايج اخطبها حق ولدي موت غاوي .. ام بلاير : الله يهديج اصبري مب جيه البنات يستحن .. ام موت عيناوي : هيه يحليهن والله استحن وما قاموا يرمسن حتى .. اخت بلاير تحاول ان تلطف الجو : امايه شو رايج انا بعد ادورين لي على خطيب ههههه ام بلاير : انطبي انتي صدق يوم سماج بلاير نسره .. اخت بلاير : امايه متى العشاء البنات ما يقدرون يتاخرون واايد .. ام بلاير : هيه صدقج يالله قومي ويايه خلينا انيب الصحون عيل .. ام موت غاوي : يالله وانا بعد سايره وياكم علشان اساعدكم .. في مجلس الرجال .. اماراتي : اقول جرح الامارات شو رايك في القصه الاخيره اللي كتبتها في المنتدى .. جرح الامارات : القصه اوكي بس انته لا اتيب طاري القصص جدام بلاير لان عنده حساسيه من مجلس القصص .. اماراتي : انا ما عليه منه اذا بغيت اقول شي بقوله عادي .. جرح الامارات : ياخي ما في داعي تفتح هالسالفه الحين الريال امسوي عزيمه وعازمنا ونحن في بيته .. اماراتي : هذا نجح بتقدير ضعيف وامنجحينه جوازاً وامسوي عزيمه عيل لو بتقدير امتياز شو بيسوي اكيد بيعزمنا في برج العرب ها ها ها … جرح الامارات : خلاص اسكت وصولوا ويا الصحون وخلنا ناكل وانطوف الليله على خير .. بلاير : اتفضلوا شباب الاكل جاهز ... السيف : ماشاء الله هذا الاكل اللي يربي الكرووش والا بلاش .. عبد الناصر : ما بغيتوا اتحطون الاكل وانا ما اتغديت علشان اطلع حرتي في الاكل عندكم اليوم .. موت عيناوي : اهم شي ان موت غاوي وبلاير ما يقعدون عند بعض في وقت الاكل ما فينا انشوف صحون تطاير فجئه .. موت غاوي : ههههههه عيل عناد الحين انا بيلس حذال بلاير .. بلاير : تعال حذالي بس طب ثمك وخلنا ناكل بدون تعليقات .. في مجلس الحريم ... ام بلاير : عليكم بالعافيه بنات ولا تستحون البيت بيتكم .. الخواطر : مشكوره خالتي والله ما قصرتوا والاكل واايد .. طيف النور : هههههه ما ادري ليش الخواطر من تشوف الاكل ما تعرف حد فينا .. شموخ الامارات : لو سحمتي طيف النور اي كلمه زياده عند الاكل راح ادون عليها ملاحظه وانقص من درجاتج في المنتدى .. وّد : هيه صح اختي شموخ هذي وااايد تتكلم .. شموخ الامارات : وانتي محد طلب رايج وخليج في حالج .. همس القوافي : يا اخواتي صلوا على النبي شو فيكم .. سجى الليل : اللهم صلي وسلم على سيدنا محمد .. اخت بلاير : شو فيج مرفوعة الراس ما تاكلين اشوفج .. ام موت غاوي : لا تستحين بنتي تعشي .. مرفوعة الراس : لا ما اقدر اكل زياده لاني امسويه رجيم واخاف يخترب الرجيم لو كثرت من الاكل .. الخواطر : ههههههه انتي امسويه رجيم ليش من متنج الحين .. مرفوعة الراس : مب شرط اكون متينه علشان اسوي رجيم وثاني شي والله انتي اللي يبالج رجيم قاسي علشان تخفين هالوزن الزايد اشويه .. الخواطر : هههههههه ما عليه منج .. ناوليني صحن السلطه انتي .. في مجلس الرجال ... اماراتي : اقول موت عيناوي وين ما انشوفك في المنتدى هالايام عسى ما شر .. موت عيناوي : والله اخويه مشغول اشويه وعندي ارتباطات كثيره وما عندي وقت ادخل النت .. موت غاوي : ههههههههه اللي يسمعك يقول راح تشارك في حل ازمة الشرق الاوسط ... بلاير : اذا اخذنا قضية الشرق الاوسط وتناولنا محورها ونظرنا الى سلبياتها وايجابيتها سنرى اننا من صنعنا هذه الازمه .. موت غاوي : اووووووووف الله يرحم والديك يا بلاير غير السالفه ولا ادخلنا في السياسه ووجع الراس .. جرح الامارات : ياخي خله يتكلم شو فيك على بلاير انته .. موت غاوي : شو يتكلم يا ريال لو تكلم في السياسه ما بيخلص لين باجر خله يسكت ابركله صدقني .. بلاير : موت غاوي خلاص بسكت بس خلهم ياكلون الحين واكرمنا بسكوتك من تعليقاتك الماصخه .. موت غاوي : ههههههههه يحليلك يا بلاير ... عبد الناصر : عطوني صحن الهريس خلوني استمتع بالاكل وبالاستماع اليكم ههههه ... السيف : الحمد الله انا شبعت وما قصرتوا كلكم .. انتهى الجزء الاول من المسرحيه .. والجزء الثاني يحتوي على عدت مفاجاءت وخصوصا بعد اشتعال النار في مجلس الحريم بعد الانتهاء من الاكل والسبب في هذه النار ................. الخ ... ملاحظه : ما كتب في اعلاه من الاسماء الموقره لا يعبر بالضروره عن وجهات نظر الكتّاب الكرام والكاتبات الكريمات ..وارجوا من يرغب في عدم إيراد إسمه المستعار أو الإسم الذي يكتب فيه بالمجلس في الجزء الثاني فأرجو أن يبلغني بذلك من خلال رسالة بريدية مختصرة وأعتذر له مقدما على ورود إسمه الموقر هنا دون الحصول على إذن منه .. دمتم بود .. الفقير الى عفو ربه بلاير ..
|
|
05-30-2005, 04:21 PM
|
#2 | ||||
|
البدايه حلوه..
وملفته بصراحه... تسلم اخويه player... ونرقب الجزء الثاني باحر من الجمر... اختك.. دمعة_الندم
|
||||
|
05-30-2005, 06:13 PM
|
#3 | |||
|
السلام عليكم ورحمة الله وبركاته ..
أهنيك اخوي بلاير على هذي المسرحية .. الصراحة المسرحية اكثر من رائعة ألي يشوفك تكتب فمنتدى النقاشات بتلك الجديه ما يتوقع انه كل هذا يطلع منك  والله طلعت مب هين ..على العموم مبروك على التخرج من الجامعة بدرجة مقبول و بجدارة  و لا وبعد مسوي عزيمة عيل لو صدق مثل ماقال اماراتي لو ناجح بمتياز شو بتسوي هههههه .. يالله عاد لاتبطي علينا  ننتظر التكمله
|
|||
|
05-30-2005, 07:44 PM
|
#4 | ||||
|
السلام عليكم ورحمة الله وبركاته
 مبرووووووووووك على التخرج حتى ولو كان جوازا المهم انك افتكيت من الدراسة وعوار الراس وحامل شهادة قد الدنيا  بداية جيدة و ننتظر الجزء الثاني بس عاد هالله هالله في مجموعتنا ومش كل الحريم يتناجرون  تحياااتي
|
||||
|
05-30-2005, 07:54 PM
|
#5 | ||||
|
البداية حلوة
ونتريا بقية الاجزاء
|
||||
|
05-31-2005, 02:19 AM
|
#6 | ||||
|
  لي عــــــــــوده
|
||||
|
05-31-2005, 03:33 PM
|
#7 | ||||
|
بدايه موفقه باذن الله تعالى
اكيد القصه تكون مختلفه عن كل القصص شدوا الهمه ابطالنا
|
||||
|
05-31-2005, 07:48 PM
|
#8 | ||||
|
~~player~~
مبروك التخرج اولا.. بداية جيدة تنذر عن الكثير الكثير من المفاجئات كل الشكر لك ونحن في انتظار الباقي على احر من الجمر لك التحيات.. أوتار الامل
|
||||
|
05-31-2005, 11:02 PM
|
#9 | ||||
|
 الله يعطيك العافية اخوي player ع القصة الحلوة ... ما شاء الله بداية ف قمة الرووووووعة .. وايد عيبني نقعتني من الضحك ... تسلم و اتريا الاجزاء الياية .. مشكور اخوي ..  اختك  7amodi
|
||||
|
06-01-2005, 01:11 AM
|
#10 | ||||
|
بدايه موفقه اخى العزيز
تمنياتى لك بالتقدم ان شاء الله الشوق96
|
||||
|
| العلامات المرجعية |
| عدد الأعضاء الحاليين الذين يشاهدون محتوى هذا الموضوع : 1 (0 عضو و 1 ضيف) | |
| أدوات الموضوع | |
| طرق العرض | تقييم هذا الموضوع |
|
|
العرض العادي
