|
|
|
|
|
|
||
| إعلانات منتديات ألم الإمارات |
|
|
|||||||
| مجلس الحوار و المقالات مناقشة القضايا الإنسانية والفكرية و الأحداث الراهنة ، يمنع نشر المشاركات المنقولة . |
 |
|
|
LinkBack | أدوات الموضوع | تقييم الموضوع | طرق العرض |
|
#1
08-04-2005, 05:47 AM
|
|||
|
|||
هود هود يتكم أم عليوي ...
السلام عليكم ...
قبل كل شي حبيت أعرفكم بالموضوع اللي بطرحه اليوم ... سلمكم الله هالموضوع كنت طارحتنه من زماااان في منتدى من المنتديات ... بعدها نقلته لمنتدى ثاني .. والحمدالله لاقى صيت حلو ... وهالموضوع عباره عن محاكاه لواقع نعيشه ولكن بصوره ثانيه .... أقروا الموضوع وبتعرفون شو أقصد .. وأتمنى أسمع ردودكم ... !!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!!!!!!!!!!! السلام عليكم... حيا الله عياااااليييييي.. شحالكم عساكم بخيير؟؟ اقربوا فديتكم حياكم ... يمكن انتوا ماعرفتوني الين الحين ...سلمكم الله انا اسمي غبيشه الملقبه بام عليوي يتكم ام عليوي وياخراريفها.. بس قبل مااخرفلكم خروفه بقولكم متى بتحصلوني.. كل خميس الساعه 10 فليل انا بكون ميلسه هنه ان شالله وبخبركم قصه استوتلي... والحينه تعالوا اتيمعوا عندي وبخبركم .. منطوووووووووووووووووووق ايلسي كسرتي المواعين  الم قلب انطبي وايلسي بعيد وبسج مصايب اليوم ... يالله ايلسوا واسمعوا اخر خروفه استوتلي ويا بوعليوي وياعيالي وعيال عيالي.... من كم يوم ..يالسه انا في الحوي واتسمع قصايد اول.. وكنت اتذكر عاد ايامي يوم انا صغيرونه وماحلاتني ربي يحفظني..ومتسانده على التكيه الي ورايه ... شوي والا اشوف شي لابق ويمشي جدايي ..انا قلت البيت احترق.. شليت بعمري يايه بوقف والا يوم انتبه الا اشوفه بو عليوي..ويدي شو مسوي بعمره هذا تميت افرك عيني قلت جنه الا احترق بلاه ملبس حمر اليوم  ويوم اشوف منو يمشي عداله ثراها بنت بنتي مستويه جنها حديقة ورد ..ماخلت ورد حمر الا ويابته ومشلشتنه في ايدها.. قلت بلاهم تخبلوا اهل البيت.. يوم وصلوا عندي يابوعليوي وياعكازته ووقف جدامي وقالي شو رايج؟؟ قلتله شو هالشعابيط الي ملبسهم منو قاص عليك ملبسينك صروال وقميص ولونه حمر بعد عنبوه البس اسود البس ازرق حمر مره وحده.. ماسمعني يا ويلس عدالي ... شوي الا واحس شرات الطابوقه الي طاحت على ريلي... ترى هالمستخفه بنت بنتي حطت شيرة الورد على ريلي...فتنت عليها فتنه شلييي هالورد شلج طهف عنبووه تفججت عظامي... شلتها وتميت اهوس على ريلي... شوي والا اسمعها تقولي رمسه ماصخه مافهمتها... قالتلي امي العوده.. قلتلها وخيبه ... جان تقولي (( هابي فليييت..مادري فلانتينت.. شدراني شقايل يقولونه ..فلاتنتاتي داي)) قلتلها ولد منو هذا بعد؟؟ جان تقولي لاااااااا يدووه يعني عيد حب سعيد.. قلتلها شو هالمنكر بعد اي عيد بعد هذا الي ياي.. بعدني مافصلت مخوره... الا واشوفلكم الشيبه يضحك ومظهرلي هالضرس الباجي في حلجه ... قلتله وبلاك انته تضحك ؟؟ قالي ياام عليوي .. هالعيد الا هو يوم واحد ويحتفلون فيه..قلتله شو هالمنكر بعد مااحيد ان شي عيد يوم واحد من وين يانا بعد هالعيد؟؟ جان يقولي ..هالعيد سلمج الله الناس يلبسون فيه حمر ويطرشون رسايل وورود حق بعض وكل شي يكون حمر.. قلتله والخيبه مب حكم هذا..عيل انا شو اسوي بعمري.. بسير احط حنا على راسي عسب استوي جني حريجه ... ضحكت بنت بنتي عليه ..جي انزين قلت شي غلط... وعقب نشدتها.. منو قالكم ان اليوم عيد؟؟ جان تيلس بنت بنتي جدامي وتقولي قصة هالعيد... قالتلي (( امي العوده سلمج الله هالعيد قصته ان عند الانجليز يحتفلون فيه .. وقصته ان واحد من اهل الدين عندهم مات لانه حب وحده وعندهم هناك لازم الي من اهل الدين مايتزوج ولا يحب ولا حتى يفكر انه يخطب..ويوم مات سموا اسم العيد عليه ..وقالتلي اسمه الخايس ..فليت ..)) من خلصت رمستها يايه بشل المكسنه وبضربها ضرب المستخفه ..لو ماشردت جان هي ميته في ايديه الي ماتستحي... صديت على بو عليوي..وقلتله .. وانته هذيل الفريخات يقصون عليك وانته تصدقهم؟؟ يبونك تحتفل وياهم بعيد العنقريز ؟؟ والله انك ماتفكر.. جان يقولي وانا شلي بنت بنتج يت وقالتلي البس هاللبس وانا لبست .. قلتله والله لو يقولولك فر عمرك في البحر بتفر بعمرك ... عنبوه اسال قول ليش ؟؟تبا تحتفل وياهم بعيد الكفار؟؟ جان يقولي لالا امي مايخصني وشل بعمره فقير بو عليوي ومشى وياعكازته وسار يبدل هالشعابيط الي ملبسها... يابوكم انا مستعيبه من هالناس... هنه عندنا بنسوي كل الي يسوونه العنقريز .. لو يذبحون عمارهم حتى بنصيح عليهم وبنسوي الي يسوونه لكن خل واحد فينا يسوي حفله جان الا بنشوف واحد منهم يشاركنا... وانتوا بعد فكروا عندكم عقل كل ماقال واحد فيهم فلان مات بتسووله عيد ... حق كل شي هذيلاك عندهم عيد .. عيد الطماط ..عيد البصل.. عيد الدياي .. والحينه عيد الحب... الله راضي عليكم وعاطنكم عيدين تفرحون فيهم ... الا تشلون شلايلكم وتعيدون وياهم ... لا وبعد مناجر مااشوف الا الوحده لابسه احمر في حمر.. وصابغه بلون احمر .. وتدور على ربعها وعلى خواتها بالورد .. جي انتي ماتحبينهم الا يوم واحد في السنه ؟؟؟ وباجي الايام ؟؟متعاديه وياهم؟؟؟ لا والريل مايطرش حق حرمته هدايا الا هذاك اليوم مانزل عليه الحب الا يوم واحد في السنه ؟؟؟ وهي بعد ماتتعدل الا هذاك اليوم وباجي الايام تدور بكشتها في البيت تقولين جنها مخمه مجلوبه ... لا ومنكر يديد ظاهرين فيه هالصغاريه الا كل واحد اشوفه ساير ومب مخلي عروسه مب شارنها وقلوب وورود ومودنها حق بنت يرانهم ولا وحده من هالبنات ؟؟؟ جي وين يالسين نحنا ؟؟؟ شفتوهم هذيلاك الي مايستحون ولا لهم حيا ولا مذهب سووا هالمصاخه سويتوا مثلهم ؟؟؟ حرام عليكم خافوا ربكم وانتوا تحتفلون بعيد هالكفار... ماتخافون باجر تنحشرون وياهذا فليت مادري فليتنات مالكم في جهنم ؟؟؟ الله يرحم ايام اول ... يوم ان ماعندنا الا عيدين ..نسييييييير ونعايد باهلنا وبربعنا ..ومستانسين وكلنا نحب بعض طوول السنه مب نتصدق بحبنا يوم واحد في السنه .. يابوي جني الا طولت عليكم ..وماخليتكم ترمسون حد منكم يبا يقولي شي ؟؟ اسمحولي عاد انا يوم ارمس مااسكت  
|
|
08-04-2005, 03:29 PM
|
#2 | ||||
|
ثانكيووو فيري ماتش ...
نتريااا تخاااريفج اليديدة ((أم عليوي)) تحياتي لج..
|
||||
|
08-04-2005, 03:34 PM
|
#3 | |||||
|
اقتباس:
 جاسني أحباط قلت أكيد محد عيبه الموضوع ...  مشكووووووووووره اختي بنوته على مرورج الحلو وماتقصرين اختج::الم قلب ...
|
|||||
|
08-04-2005, 03:51 PM
|
#4 | ||||
|
ألم قلبي .. بصراحة ابدعتي بهالخروفه ..
كثـــري منهــــا  الله يهدي بنت بنتج .. خخخخخخ وشيبتج ... ويهدي يميع اللي يمشون على مناكر الغرب .. وصح لسانج .. نحن ما عندنا إلا عيدين .. والحمدلله رب العالمين على نعمة الاسلام .. ونترياااااااج بعيد الأم 
|
||||
|
08-04-2005, 05:12 PM
|
#5 | ||||
|
 السلام عليكم أختيه الغالية.... ألم قلب تسلمين أولاً على الأسلوب الفني التراثي المميز والمبدع في آن واحد وأحييج عليه هاتي خشمج >< وبعطيج راي فيه لأنه صراحة غمضني الشيبه ... صدم أم عليوي يحليلها؟ سمعيني الشيخة : سوف يكون من أمة محمد صلى الله عليه وسلم أقوام ينحرفون عن الحق صوب الباطل يغيرون ويبدلون.... ومن أعظم مظاهر التغيير والتبديل، والتنكر لدين محمد صلى الله عليه وسلم اتِّباع أعداء الله - تعالى - في كل كبيرة وصغيرة، باسم الرقي والتقدم، والحضارة والتطور، وتحت شعارات التعايش السلمي والأخوة الإنسانية، والنظام العالمي الجديد والعولمة والكونية، وغيرها من الشعارات البراقة الخادعة. وإن المسلم الغيور ليلحظ هذا الداء الوبيل في جماهير الأمة إلا من رحم الله - تعالى - حتى تبعوهم وقلدوهم في شعائر دينهم وأخص عاداتهم وتقاليدهم كالأعياد التي هي من جملة الشرائع والمناهج. والله - تعالى - يقول: ولا تتبع أهواءهم عما جاءك من الحق لكل جعلنا منكم شرعة ومنهاجا وإذا كان كثير من المسلمين قد اغتروا ببهرج أعداء الله - تعالى - خاصة النصارى في أعيادهم الكبرى كعيد ميلاد المسيح - عليه الصلاة والسلام - (الكريسمس) وعيد رأس السنة الميلادية، ويحضرون احتفالات النصارى بها في بلادهم؛ بل نقلها بعضهم إلى بلاد المسلمين - والعياذ بالله - فإن البلية الكبرى والطامة العظمى ما يجري من استعدادات عالمية وعلى مستوى الدول النصرانية الكبرى للاحتفال بنهاية الألفية الثانية والدخول في الألفية الثالثة لميلاد المسيح ابن مريم  ومن أشهر أعيادهم: عيد الحب: يحتفلون به في يوم (14) فبراير من كل سنة ويبدو أن عيداً آخر نشأ من مفهوم هذا العيد ذلك هو عيد الزوجين أو الصديقين المتحابين يحتفل به الزوجان في يوم ذكرى زواجهما من كل عام لتأكيد المحبة بينهما، وانتقلت هذه العادة إلى المسلمين بسبب المخالطة حتى صار الزوجــان يحتفلان بليلة زواجهمـــا احتفالاً خاصـاً في كثير من بلاد المسلمين؛ تشبهاً بالكفار؛ فلا حول ولا قوة إلا بالله العلي العظيم.  تسلمين أختي على الموضوع المميز والسموحة على الإطالة وتقبلي مني أرق وأعذب تحية ؛؛؛ أختج الكبيرة...همس القوافي
|
||||
|
08-05-2005, 01:07 AM
|
#6 | |||||
|
اقتباس:
ياامي الله يهدي هالشيبه وهالعيال ... من يقولون بنسوي شي لازم هو وياهم ... ولا جنه الشيب تارس راسه ... نرجع لألم قلب  احم احم .. أول شي أشكرج أختي على مرورج الحلو وماقصرتي ... وللأسف عزيزتي نلاقي التقليد ماشي هالأيام وخصوصاً هالجيل اللي نحن عايشين فيه ... لازم جيلنا يقلد حتى لو كان التقليد ماله معنى ... لكن المهم انهم يقلدون والسلام .... ونسوا ان عندنا ميزه عن هالكفار وهي ميزة العقل وميزة الأسلام .... مانقدر عزيزتي الا نقول لا حول ولا قوة الا بالله ... مشكوره غناتي على مرورج الحلو وماتقصرين اختج::الم قلب ...
|
|||||
|
08-05-2005, 05:28 AM
|
#7 | |||||
|
اقتباس:
أخي الكريم في البدايه أشكرك على مرورك الكريم ... بالنسبه لهالموضوع ... موضوع الأعياد مثل عيد الحب وعيد الأم موجود في بيئتين أكثر شي ... في ((مدارس البنات أكثر شي )) .... ونسبه قليله يمكن بين شباب (( هاليومين )) اللي يبغي يقطع أي شي له علاقه بأصله العربي ...ويلبس قناع الغرب والتحرر .... في مدارس البنات صدقني لو تشوف العجب عجاب اللي يصير هناك ... ماأعمم على المدارس كلها ولكن البعض منها ... أذكر يوم كنا في المدارس طلعت موضه يديده البلونات الحمره والورود ومن غير موضة الحيوانات الأليفه شي يبيعون الأرانب الصغيره اللي عيونها حمره ويلفون رقبتها بشريطه حمره ويحطونها في كرتون مزين ويقدمونه لصديقاتهم ...جي مااعرف ؟؟؟؟ للأسف أخويه لو تعمقنا في هالموضوع بنشوف لأي حال وصلنا ... والسموحه على الأطاله اختك:: الم قلب ...
|
|||||
|
08-05-2005, 05:54 AM
|
#8 | ||||
|
مشكووووووووره عيوزنا ... ربي يعافيج على هاي الخريريفات الحلوه ...
وصح السانج نحنا مسلمين وما عندنا غير عيدين ... الله يجازيج خير ... ونحنا نتريا خراريفج اليايه ^_^ حفيدج ^_^ دموع الشوق
|
||||
|
08-05-2005, 03:14 PM
|
#9 | ||||
|
تسلميييييين ألم قلبي عالخروفه
ونتريا خروفه يديده
|
||||
|
08-05-2005, 06:09 PM
|
#10 | |||||
|
اقتباس:
وعليكم السلام ورحمة الله ... هلا والله بأختي همس ... أختي الغاليه ... هالأعياد اليديده اللي طلعت لو تناقشنا فيها مع أي واحد يحتفل فيها ويعترف بهالأعياد بيرد برد واحد ... أنتوا ليش محرمين كل شي ومكبرين السالفه ؟؟؟ للأسف عزيزتي قمنا نشوف الحرام حلال في نظر البعض .... مانقدر نقول غير ربي يهديهم ومشكوره الغلا على مرورج الحلو ... اختج::الم قلب ...
|
|||||
|
| العلامات المرجعية |
| عدد الأعضاء الحاليين الذين يشاهدون محتوى هذا الموضوع : 1 (0 عضو و 1 ضيف) | |
| أدوات الموضوع | |
| طرق العرض | تقييم هذا الموضوع |
|
|
العرض العادي
