+:: سلسلة حلقات وطر مضى ::+

ما شا الله عليك ياخويه



موضوع غني بالمعلومات القيمه
وبرجع للحلقات الماضيه
لنه فاتني الكثير



ونرقب يديدك ياخويه من هالحلقات وغيرها




وربي يعطيك الصحه والعافيه

السلااااااااااام عليكم ورحمة الله وبركاته

مرحبا اخوي اوتار

مشكووووووووور عالمعلومات الحلوة

والمفيدة

تدري اول مرة اعرف ان القرف اهو القشور مال الفواكة

واول مرة اعرف ان البرتقال كان اسمه غير يعني اول كانو يسمونة غير عن الي الحين نسميه

اي اي انا بعد اعرف شنو معنات الترني اهو الاترجة خذينا فيه درس فالشرعيه<<يعني داشة تسمعين الي حافظته خخخخخ بنمتحن فيه خخخخ

و و و مشكوووووووووووور عالمعلومات

تسلم ويعطيك العافية

اي صح نسيت اقول شي<<طبعا تنسين من كثر الحجي

هههههه

تقبل الله

و ننتظر الموضوع اليديد يلا انا بروح بحط فطور مابطرش لكم <<ياحسودة انتي خخخخ

اختكم
دانة الدوحة

تسلم على المعلومات القمية

دومك مواضيعك حلوه وفيها معلومت قيمه ومفيده لانه مشكوره على هل معلومات لان نستفيد منها بصراحه ونترياك في موضوع اليديد

هلا والله وغلا
تسلمون اخواني على المرور والردود الراقيه
دانة الدوحه
شخبارج انتي عساج بخير
^_^
ابدويه & بنت البحر & غريم الشوق
انتظروا الجديد وتحياتي العطــره لكم
اخوكم
أوتـ(الحزن)ـار

اخواني أعضاء منتدى ألـم الإمارات

وصلنا وياكم للحلقه العاشــره من

( سلسلة شيئ من التراث )

( وطــر مضــى )

عادات وتقاليد ومعتقدات وأساطير خرافيه

أعدها وكتبها

الباحث الشعبي القطــري المعروف

خليفــة السيـــد محمـــد صالـــح المالكــــي


طبعاّ السلسله هاذي

حصرياّ لأوتـ(الحزن)ـار

جمعتها ونقلتها ونسختها بترخيص من الكاتب . خليفـه السيـد

الحلقة العاشــره من وطــر مضــى مــع الوالد خليفـة السيـــد

(( اللاتري وحظــك نصيبـــك ))



اللاتري وحظك نصيبك كلمة شعبيه لها نفس المعنى واللاتري هذيه حرام ويعتبر نوع من القمار او الميسر واهوه انواع كثيره واساليب مختلفه ادور واتلف واتعود على نفس المنوال حظك نصيبك .
وزمان اول كان اهناك محلات مفتوحه حق اللتري وحظك نصيبك وفي بعض الاحيان بعض الناس تفرش لها بسطه واتحط عليها ( خشره مشره ) يعني بضاعه اي كلام واتسميها حظك نصيبك.
والناس تلتم عليهم وكلن يجرب حظه ومن انواع حظك نصيبك زمان اول
واحد مثلاّ عنده سياره وهذي السياره ماتسوى الا خمسة الاف ربيه وعلشان ايبيعها بعشرة الاف ربيه ايسوي عليها لاتري وايروح يطبع له عشر دفاتر تذاكر كل اورقه بعشر ربيات وكل دفتر فيه امية اورقه يعني الدفتر لين انباع يصفي الف ربيه في عشر دفاتر المجموع كله عشرة الاف ربيه
وبعدين ايوزع هذي الدفاتر على ربعه يعطي كل واحد منهم دفتر علشان ايبيعه له
اما بنسبه والا بأجار وايتمون هذيله الباعه ايدورون في السوق واهما اينادون على التذاكر وايحددون موعد للسحب وايسمونه ( الفـــر )
وايقولون عقب شهر بنفر الاتري يعني بنجري السحب والناس تشتري اللي يشتري له تذكره واللي ثنتين واللي ثلاث
التذكره بعشر ربيات يابلاش يعني يمكن تظهر لك السياره بمبلغ عشر ربيات
وعقب شهر واو شهرين يجرون عملية السحب وايفرون الاتري وايفوز بالسياره نفر واحد ويمكن هذيه النفــر شاري تذكره وحده ابعشر ربيات ويمكن شاري تذكرتين ابعشرين ربيه .
ونوع ثاني من حظك نصيبك زمان اول ايحطون طاوله امدوره ودار مادارها ايحطون ارقام وفي الوسط ايركبون شي مثل السهم مثل عقرب الساعـة
وهذي لرقام وراها الجوائز
رقم وراه مسجل ورقم وراه رادو ورقم وراه ساعة ورقم وراه كبريت ورقم وراه صحن وعلى عدد لرقام بعض لرقام وراها شي مفيد وله قيمه وبعض لرقام ماوراها الا الخساره وانت وحظك تدفع افلوس واتفر السهم ومكان مايوقف السهم تاخذ الجائزه اللي وراه واتروح او اتحاول مره ثانيه.
وحتى اليهال زمان اول عندهم حظك نصيبك ولكن على شكل اكياس حلاوه فيها لعبه اصغيره يشتري الياهل واهوه وحظه
واهناك ايضاّ النفافيخ وهي عباره عن اورقه بطول سيادة الصلاه وعليها ارقام وكل رقم احذاه نفاخه والنفافيخ تتدرج احجامها من نفاخه اصغيره طول اصبع السباب الى نفاخه اكبيره اكبر من حجم الياهل نفسه
واليهال يشترون التذاكر اللي فيها الارقام طمعانين في النفاخه العوده
انواع كثيره من اللاتري وحظك نصيبك كانت موجوده في الماضي واللي ذكرته لكم اهوه قطــره من بحـــر بالنسبه للأساليب المتبعه زمان اول .
اما الحين الاساليب زادت وتنوعت وصارت بالإتصالات او عندما تترس سيارتك بترول او عندما تشتري بضاعه
والمسأله تتطور واتزيد الأفكار وتنتشر والكل ايقلـد الثـــاني ويبغــي ايمشي بضاعته والناس مساكين مايدرون عبالهم هذيه شي جديـــد مايدرون ان هذيه اهوه حظك نصيبك واهوه اللي انسميه اللاتري ولا نتعامل معاه لانه مثلما قلت لكم حــرام واقمــــار .

وانتظروا الحلقــه القادمــه وهي بعنوان يزو امك عيوز...وابوك قطـو نيروز وفاااالكم طيــــب

أوتـ(الحزن)ـار

تسلم ماعليك قصور

تسلمين على الرد الشيخه

اوتار

تسلم اخوي وفالك ما يخيب انشالله دوم مواضيعك مميزه وتريا موضوعك اليديد

مساء الفروالة .. والكادي ..

الف شكر لك يالطيب
عـ المشاركة الحلووة ..

في انتظار المزيد منك ..

يامرحباني